بلوچستان سوراب میں دہشتگردی کا منصوبہ خود ہی اپنے انجام کو پہنچ گیا، خود کش حملے کے لیے گاڑی تیار کرتے ہوئے دھماکہ، ہلاک دہشتگردوں کی تعداد 22 ہوگئی، دھماکہ خیز مواد کا بڑا ذخیرہ بھی تباہ

بلوچستان کے علاقے سوراب میں گزشتہ شب خودکش حملے کے لیے گاڑی تیار کرتے ہوئے دھماکا ہوا، جس کے نتیجے میں 9 دہشت گرد ہلاک ہوگئے۔

دھماکے سے قریبی مکانات کو بھی نقصان پہنچا جبکہ علاقے میں شہری ہلاکتوں اور زخمیوں کی اطلاعات بھی سامنے آئی ہیں۔

لیویز اور سیکیورٹی فورسز نے موقع پر پہنچ کر فرار ہونے والے دہشتگردوں اور مبینہ سہولت کاروں کے خلاف کارروائی شروع کردی۔

سوراب میں دہشتگردوں کی تیاری کے دوران دھماکا

ذرائع کے مطابق سوراب کے قریب گزشتہ شب دہشتگرد ایک گاڑی میں خودکش حملے کی تیاری کر رہے تھے کہ اسی دوران زور دار دھماکا ہوگیا۔ دھماکے کے نتیجے میں 9 دہشت گرد ہلاک ہوگئے۔

یہ بھی پڑھیں:پنجگور میں سیکیورٹی فورسز کا کامیاب آپریشن، فتنہ الہندوستان کے 5 دہشتگرد ہلاک

ذرائع کا کہنا ہے کہ ہلاک ہونے والے دہشتگردوں کا تعلق ’ایف اے ایچ‘ سے ہو سکتا ہے۔ تاہم ان کے تنظیمی وابستگی سے متعلق تفصیلات کی آزادانہ طور پر فوری تصدیق نہیں ہوسکی۔

قریبی مکانات کو نقصان، شہریوں کی ہلاکتوں کی اطلاعات

دھماکا آبادی کے قریب ہونے کے باعث متعدد قریبی مکانات کو نقصان پہنچا۔ علاقے میں موجود بعض شہریوں کے جانی نقصان اور زخمی ہونے کی اطلاعات بھی موصول ہوئی ہیں، تاہم شہری ہلاکتوں اور زخمیوں کی حتمی تعداد تاحال واضح نہیں ہوسکی۔

دھماکے کی شدت کے باعث علاقے میں خوف و ہراس پھیل گیا، جبکہ سیکیورٹی اہلکاروں نے فوری طور پر جائے وقوعہ کو گھیرے میں لے کر شواہد اکٹھے کرنے اور ممکنہ خطرات کا جائزہ لینا شروع کردیا۔

فرار دہشتگردوں اور سہولت کاروں کے خلاف کارروائی

اطلاعات کے مطابق دھماکے کے بعد لیویز اور سیکیورٹی فورسز نے علاقے میں کارروائی شروع کردی۔ فرار ہونے والے ممکنہ دہشتگردوں اور ان کے مبینہ سہولت کاروں کو تلاش کیا جا رہا ہے، جبکہ بعض افراد کے خلاف کارروائی اور تعاقب کی اطلاعات بھی ہیں۔

مزید پڑھیں:خیبرپختونخوا، دوہ غوڑاپل کے قریب خود کش دھماکہ، سیکیورٹی فورسز کا سرچ آپریشن شروع

سیکیورٹی ادارے دھماکے کی نوعیت، خودکش گاڑی کی تیاری اور دہشتگردوں کے ممکنہ ہدف سے متعلق مزید شواہد جمع کر رہے ہیں۔

سوراب بلوچستان کے اہم علاقوں میں شمار ہوتا ہے اور ماضی میں صوبے کے مختلف حصوں میں عسکریت پسند گروہوں کی جانب سے سیکیورٹی فورسز اور دیگر اہداف کو نشانہ بنانے کی کوششیں سامنے آتی رہی ہیں۔

 ایسے واقعات کے تناظر میں سیکیورٹی ادارے دہشتگردی کے ممکنہ منصوبوں کو ناکام بنانے کے لیے کارروائیاں کرتے رہے ہیں۔