پاکستان نے اقوام متحدہ کی کانفرنس برائے تخفیف اسلحہ کی صدارت سنبھال لی

پاکستان نے اقوام متحدہ کی کانفرنس برائے تخفیف اسلحہ کی صدارت سنبھال لی ہے، جس کے تحت پاکستان 2026 کے اجلاس کے آخری صدر کی حیثیت سے کانفرنس کی کارروائی کی قیادت کرے گا۔

دفتر خارجہ کے ترجمان کے مطابق پاکستان کی جانب سے ایڈیشنل سیکر ٹری اسلحہ کنٹرول و تخفیف اسلحہ طاہر اندرابی کانفرنس کے اجلاسوں کی صدارت کر رہے ہیں۔

سالانہ رپورٹ پر مذاکرات کی قیادت

ترجمان کے مطابق پاکستان کانفرنس کی سالانہ رپورٹ اور اقوام متحدہ کی جنرل اسمبلی کی فرسٹ کمیٹی میں پیش کی جانے والی قرارداد پر مذاکرات کی رہنمائی کرے گا۔

پاکستان نے کانفرنس کی صدارت سنبھالنے کے بعد مشاورتی عمل بھی شروع کردیا ہے، طاہر اندرابی نے 2026 کے اجلاس کے سابق صدور کے اجلاس کی صدارت کی اور مختلف علاقائی گروپس کے نمائندوں سے بھی مشاورت کی۔

🔊PR No.2️⃣1️⃣6️⃣/2️⃣0️⃣2️⃣6️⃣

Pakistan Assumes Presidency of the United Nations Conference on Disarmament

🔗⬇️ pic.twitter.com/7nyXUnX8z0

— Ministry of Foreign Affairs – Pakistan (@ForeignOfficePk) August 17, 2026

65 ممالک پر مشتمل عالمی فورم

دفتر خارجہ کے مطابق اقوام متحدہ کی کانفرنس برائے تخفیف اسلحہ اسلحہ کنٹرول سے متعلق معاہدوں پر مذاکرات کے لیے دنیا کا واحد کثیرالجہتی فورم ہے، جنیوا میں قائم اس فورم کے 65 رکن ممالک ہیں، جن میں تمام جوہری ہتھیار رکھنے والی ریاستیں بھی شامل ہیں۔

کانفرنس کے ایجنڈے میں جوہری ہتھیاروں کی دوڑ کا خاتمہ، خلا کو عسکری مقاصد کے لیے استعمال ہونے سے روکنا اور اسلحہ کنٹرول سے متعلق دیگر اہم معاملات شامل ہیں۔

پاکستان کے سفارتی کردار پر اعتماد

ترجمان دفتر خارجہ نے کہا کہ کانفرنس کی صدارت سنبھالنا عالمی برادری کی جانب سے پاکستان کی سفارتی قیادت اور تعمیری کردار پر اعتماد کا مظہر ہے،پاکستان کی جانب سے کانفرنس کی صدارت ایسے وقت میں سنبھالی گئی ہے جب عالمی سطح پر جوہری ہتھیاروں کے پھیلاؤ، اسلحہ کنٹرول اور خلا کے عسکری استعمال سمیت مختلف سکیورٹی معاملات پر مذاکرات جاری ہیں۔