راولپنڈی اور اسلام آباد میں تیز بارش کے باعث نالہ لئی کے بہاؤ میں اضافہ ہوگیا ہے۔
محکمہ موسمیات کے مطابق گولڑہ میں 60، بوکرہ میں 31، شمس آباد اور پیر ودھائی میں 25، نیو کٹاریاں میں 21 اور گوالمنڈی میں 22 ملی میٹر بارش ریکارڈ کی گئی۔
ایم ڈی واسا کا کہنا ہے کہ تیز بارش کے باعث ایک مرتبہ پھر نالہ لئی کے بہاؤ میں اضافہ ہوا ہے، اس وقت کٹاریاں کے مقام پر پانی کی سطح 11 فٹ ہے ، گوالمنڈی پل کے مقام پر پانی کی سطح 6 فٹ ہے، نالہ لئی سمیت نشیبی علاقوں میں عملہ ہیوی مشینری کے ساتھ موجود ہے، نشیبی علاقوں میں اضافی عملہ تعینات کیا گیا ہے۔
ایم ڈی واسا کے مطابق موسمی صورتحال کے پیش نظر راولپنڈی میں رین ایمرجنسی نافذ ہے، نالہ لئی سمیت دیگر نالوں کی مانٹیرنگ جاری ہے۔
اس حوالے سے ڈپٹی کمشنر کا کہنا ہے کہ ہنگامی صورتحال سے نمٹنے کیلئے تمام انتظامات مکمل ہیں، نالہ لئی میں پانی کی سطح بلند ہونے پر ضلعی انتظامیہ نے پری الرٹ جاری کردیا، نالہ لئی کے اطراف آبادی کو محتاط رہنے کی ہدایات جاری کی گئی ہے۔
محکمہ موسمیات کی پیشگوئی
محکمہ موسمیات کے مطابق مون سون کا موجودہ اسپیل 21 اگست تک جاری رہنے کا امکان ہے، اس صورتحال میں آج کی بارش کو محض ایک عارضی شہری مسئلہ سمجھنا مناسب نہیں، کیونکہ مسلسل بارش زمین میں پانی جذب ہونے کی صلاحیت کم کرنے کے بعد مزید بارش کا پانی تیزی سے نشیبی علاقوں کی جانب منتقل کرتی ہے۔
نالہ لئی کی صورتحال
راولپنڈی میں نالہ لئی کی صورتحال اس خطرے کی سب سے اہم علامت ہے، کٹاریاں اور گوالمنڈی کے مقامات پر پانی کی سطح میں تیزی سے ہونے والی تبدیلی اس بات کی نشاندہی کرتی ہے کہ بارش میں شدت آنے پر صورتحال چند گھنٹوں میں بدل سکتی ہے۔
ایک ہی اسپیل میں بار بار ہونے والی تیز بارش شہری نکاسی آب کے نظام کو مسلسل دباؤ میں رکھتی ہے، ایسے میں وہ علاقے زیادہ حساس ہوجاتے ہیں جہاں سڑکیں نشیبی ہوں، برساتی نالے قریب ہوں یا پانی کے اخراج کے راستے محدود ہوں۔
نالہ لئی کی سطح میں اتار چڑھاؤ بھی انتظامیہ کے لیے ایک اہم وارننگ ہے ، پانی کی سطح میں وقتی کمی کو خطرے کے خاتمے سے تعبیر نہیں کیا جاسکتا، کیونکہ اوپر والے علاقوں میں ہونے والی بارش کا پانی کچھ وقفے کے بعد نالے میں پہنچ سکتا ہے ، اسی لیے مسلسل مانیٹرنگ، بروقت مشینری کی منتقلی اور ضرورت پڑنے پر نشیبی آبادیوں کا پیشگی انخلا انتہائی اہم ہے۔
By 
