رحیم یار خان : شادی کی خوشیاں ماتم میں بدل گئیں، باراتیوں کی ٹرالی اور ٹریکٹر میں تصادم، 7 افراد جاں بحق

صوبہ پنجاب کے ضلع رحیم یارخان میں شادی کی خوشیاں اس وقت ماتم میں بدل گئیں جب باراتیوں سے بھری ٹریکٹر ٹرالی اور ٹریلر کے درمیان خوفناک تصادم کے نتیجے میں 7افراد جان کی بازی ہار گئے ۔

تفصیلات کے مطابق افسوس ناک حادثہ سردار گڑھ ظاہر پیر کے قریب پیش آیا ، جس میں اب تک 7افراد جاں بحق جبکہ 60 سے زائد افراد زخمی ہوئے ہیں۔

ترجمان شیخ زید ہسپتال کے مطابق حادثے میں زخمی 3 افراد دوران علاج زخموں کی تاب نہ لاتے ہوئے دم توڑ گئے، زخمیوں کو شیخ زید ہسپتال میں تاحال طبی امداد فراہم کی جا رہی ہے۔

ڈپٹی کمشنر کے مطابق حادثے کے بعد شیخ زید ہسپتال میں ایمرجنسی نافذ کر دی گئی اور زخمیوں کو بہترین طبی امداد فراہم کرنے کی ہدایت کی گئی ہے۔

یہ بھی پڑھیں :مالاکنڈ : سوات ایکسپریس وے پر کوچ اور ڈمپر میں خوفناک تصادم ، 4 افراد جاں بحق

ڈپٹی کمشنر نے متاثرہ خاندانوں سے ملاقات بھی کی اور عیادت کرتے ہوئے قیمتی انسانی جانوں کے نقصان پر افسوس کا اظہار کیا۔

ریسکیو اور انتظامیہ کے مطابق ابتدائی طور پر حادثہ ٹرالر ڈرائیور کی غفلت اور لاپرواہی کے باعث پیش آنے کی اطلاعات ہیں، واقعے کی مزید تحقیقات جاری ہیں۔