سالگرہ پر تحفے میں ملی گھوڑی نے عالمی ریکارڈ بنا لیا

امریکی ریاست اوہائیو میں ایک گھوڑی اپنی غیر معمولی لمبی دم کے باعث دنیا بھر میں توجہ کا مرکز بن گئی۔ جینی نامی اس گھوڑی کی دم کی باضابطہ پیمائش کی گئی تو اس کی لمبائی 13 فٹ 6 انچ نکلی، جس کے بعد اسے گینیز ورلڈ ریکارڈ کا اعزاز حاصل ہوگیا۔

جینی کا تعلق امریکن سیڈل بریڈ نسل سے ہے، جس کے گھوڑے اپنی لمبی اور لہراتی دموں کے لیے مشہور ہیں۔ اس گھوڑی کی مالکن میکنزی لو اور ریچل ایسٹس ہیں۔

سالگرہ کا تحفہ، عالمی ریکارڈ تک کا سفر

میکنزی لو کے مطابق جینی انہیں 2019 میں ان کی 13ویں سالگرہ پر تحفے میں دی گئی تھی۔ گھوڑی کو حاصل کرنے سے پہلے انہیں بتایا گیا تھا کہ بچپن میں جینی نے اپنی دم خود ہی کھینچ کر اکھاڑ لی تھی۔ میکنزی نے بتایا کہ جب جینی ان کے پاس آئی تو اس کی دم زمین کو چھوتی تھی، تاہم اس وقت اس کی لمبائی موجودہ لمبائی سے کافی کم تھی۔

یہ بھی پڑھیں:پرانے سامان کی خریداری مہنگی پڑتے پڑتے بچی، ڈبوں سے فعال دستی بم نکل آئے

لمبی دم نے عالمی ریکارڈ کی راہ کیسے ہموار کی؟

میکنزی لو کے مطابق انہوں نے جینی کی دم کو قدرتی طور پر بڑھنے دینے کا فیصلہ کیا، کیونکہ گھڑ سواری کے مقابلوں میں امریکن سیڈل بریڈ نسل کے گھوڑوں کی لمبی دم کو خاص اہمیت دی جاتی ہے۔ وقت گزرنے کے ساتھ جینی کی دم مسلسل بڑھتی رہی۔ اس کی غیر معمولی لمبائی دیکھ کر مالکان نے عالمی ریکارڈ بنانے کی کوشش کرنے کا فیصلہ کیا۔

بالآخر جینی کی دم کی سرکاری پیمائش کی گئی، جو 13 فٹ 6 انچ ریکارڈ ہوئی۔ اس طرح اس گھوڑی نے اپنی منفرد جسمانی خصوصیت کی بدولت گینیز ورلڈ ریکارڈ میں جگہ بنا لی۔