بی آئی ایس پی میں کرپشن کے الزامات، نثار کھوڑو کو شہریوں کے تھپڑ پڑنے کی ویڈیو پھر وائرل

پاکستان پیپلز پارٹی کے سینئر رہنما اور پیپلز پارٹی سندھ کے صدر نثار کھوڑو کو شہریوں کی جانب سے تھپڑ پڑنے کی ایک پرانی ویڈیو ایک مرتبہ پھر سوشل میڈیا پر وائرل ہوگئی، جس کے بعد صارفین کی جانب سے مختلف تبصرے سامنے آرہے ہیں۔

 سوشل میڈیا پر بعض صارفین نے ویڈیو کو بی آئی ایس پی میں مبینہ کرپشن کے الزامات اور نثار کھوڑو کی سیاسی سرگرمیوں سے جوڑتے ہوئے ان پر تنقید کی ہے۔

ایکس پر مزمل نامی صارف نے ویڈیو شیئر کرتے ہوئے نثار کھوڑو کے حلقے کی صورتحال پر سوالات اٹھائے۔ صارف نے دعویٰ کیا کہ حلقے میں نہ اسکول ہیں، نہ ہسپتال اور نہ ہی پانی کی سہولت موجود ہے۔ مزمل نے مزید لکھا کہ نثار کھوڑو بغیر پروٹوکول اور سیکیورٹی کے کہیں نہیں جاسکتے کیونکہ عوام انہیں تھپڑ مارتے ہیں۔

اسی طرح کامران نامی صارف نے بھی ایکس پر اپنے خیالات کا اظہار کرتے ہوئے نثار کھوڑو پر تنقید کی۔ ان کا کہنا تھا کہ نثار کھوڑو کرپشن کے باعث اس قدر بدنام ہوچکے ہیں کہ وہ اپنے حلقے کے عوام کا سامنا نہیں کرسکتے۔

نثار کھوڑو کو شہریوں کی جانب سے تھپڑ پڑنے  کی ویڈیو پرانی ہے، تاہم یہ ویڈیو ایک مرتبہ پھر سوشل میڈیا پر گردش کرنے لگی ہے۔ ویڈیو کے دوبارہ وائرل ہونے کے بعد سوشل میڈیا صارفین کی جانب سے نثار کھوڑو کے سیاسی کردار، ان کے حلقے میں بنیادی سہولیات اور عوامی ردعمل سے متعلق مختلف آرا کا اظہار کیا جارہا ہے۔

نثار کھوڑو پاکستان پیپلز پارٹی کے سینئر رہنما ہیں اور پیپلز پارٹی سندھ کے صدر کی حیثیت سے سندھ کی سیاست میں اہم سیاسی کردار ادا کرتے رہے ہیں۔

وہ سینیٹ کے رکن بھی ہیں اور طویل عرصے سے سندھ کی سیاست میں فعال کردار ادا کررہے ہیں۔ ان کی سیاسی سرگرمیاں اور پیپلز پارٹی میں ان کا کردار سندھ کی سیاست میں نمایاں رہا ہے۔

سوشل میڈیا پر نثار کھوڑو سے متعلق ویڈیو کے دوبارہ وائرل ہونے کے ساتھ بی آئی ایس پی میں کرپشن کے الزامات کا بھی ذکر کیا جارہا ہے۔