ہالی ووڈ کے معروف اداکار ٹام کروز نے اپنے کئی دہائیوں پر محیط فلمی سفر، کامیابی اور مستقبل کے خوابوں کے بارے میں گفتگو کرتے ہوئے کہا ہے کہ کامیابی کے بعد رک جانا ان کی فطرت میں شامل نہیں۔
64 سالہ ٹام کروز اپنی فلموں میں خطرناک ایکشن اور مشکل اسٹنٹس خود کرنے کے حوالے سے دنیا بھر میں شہرت رکھتے ہیں۔ طویل فلمی کیریئر اور بے شمار کامیابیوں کے باوجود اداکار کا کہنا ہے کہ وہ آج بھی کسی نئے خواب کے تعاقب میں رہتے ہیں۔
ایک انٹرویو کے دوران ٹام کروز نے کہا کہ ہالی ووڈ میں کامیابیاں حاصل کرنے کے باوجود ان کی زندگی میں ہمیشہ ایک نیا خواب موجود رہتا ہے۔ اداکار کے مطابق زندگی مسلسل آگے بڑھ رہی ہے اور وہ بھی پوری توانائی کے ساتھ اس کا سامنا کر رہے ہیں۔ وہ آدھے دل سے زندگی گزارنے پر یقین نہیں رکھتے اور نہ ہی یہ سوچنا چاہتے ہیں کہ انہوں نے زندگی میں اپنی بلند ترین سطح حاصل کرلی ہے۔
ٹام کروز نے کہا کہ انسان کے سامنے ہمیشہ کوئی نہ کوئی نیا خواب ہونا چاہیے۔ ان کے بقول جس شخص کے پاس کوئی خواب باقی نہیں رہتا، وہ گویا جینے کا فیصلہ ترک کر دیتا ہے۔ مشن امپاسیبل سیریز کے اسٹار نے زندگی کے بارے میں اپنے نقطۂ نظر پر بات کرتے ہوئے کہا کہ وہ زندگی کو عام انداز سے مختلف انداز میں دیکھتے ہیں۔ ان کے لیے زندگی دراصل مختلف کہانیوں کا مجموعہ ہے۔
اداکار کا کہنا تھا کہ وہ تاریخ سے سیکھنے کی کوشش کرتے ہیں، لیکن ماضی میں زندگی گزارنے کے قائل نہیں۔ ٹام کروز نے مزید کہا کہ انہیں کامیابی حاصل کرنے اور کچھ نیا تخلیق کرنے میں خوشی ملتی ہے، لیکن کسی کامیابی کے بعد وہ وہیں رک نہیں جاتے۔ اس کے بجائے ان کے سامنے ہمیشہ ایک نیا خواب اور ایک نیا مقصد موجود ہوتا ہے۔
ان کے خیالات سے یہ بات واضح ہوتی ہے کہ کئی دہائیوں کی کامیابی کے باوجود ٹام کروز اب بھی خود کو اپنے سفر کے اختتام پر نہیں سمجھتے، بلکہ آنے والے وقت کو نئے تجربات اور خوابوں کے ساتھ دیکھتے ہیں۔
By 
