جاپان میں ہونے والے 2026 ایشین گیمز کے مینز کرکٹ مقابلوں سے قبل پاکستان کرکٹ ٹیم میں اہم تبدیلی کردی گئی ہے۔ فاسٹ بولر سلمان مرزا انگوٹھے میں فریکچر کے باعث اسکواڈ سے باہر ہوگئے۔
سلمان مرزا کی جگہ محمد وسیم جونیئر شامل
سلمان مرزا کی جگہ فاسٹ بولر محمد وسیم جونیئر کو قومی اسکواڈ کا حصہ بنالیا گیا ہے۔ سلمان مرزا کے بائیں انگوٹھے میں فریکچر ہوا ہے۔
سلمان مرزا کی انجری کے باعث انہیں ایشین گیمز کے مینز کرکٹ ایونٹ میں شرکت سے محروم ہونا پڑے گا۔ ان کی مکمل فٹنس اکتوبر کے پہلے ہفتے تک بحال ہونے کی توقع ہے۔
24 ستمبر سے کرکٹ مقابلوں کا آغاز
ایشین گیمز میں مینز ٹی ٹوئنٹی کرکٹ مقابلوں کا آغاز 24 ستمبر سے ہوگا۔ ایونٹ میں مجموعی طور پر 10 ٹیمیں حصہ لے رہی ہیں۔
بھارت، پاکستان، سری لنکا، بنگلا دیش، افغانستان اور میزبان جاپان براہ راست کوالیفائی کرچکے ہیں۔ نیپال، ملائیشیا، ہانگ کانگ اور عمان کوالیفائنگ مرحلہ کھیلیں گے۔
پاکستان کا پہلا کوارٹر فائنل 28 ستمبر کو
صاحبزادہ فرحان کی قیادت میں پاکستانی ٹیم اپنا پہلا کوارٹر فائنل 28 ستمبر کو کھیلے گی۔ قومی ٹیم کا مقابلہ کوالیفائنگ مرحلے سے آنے والی ٹیم سے ہوگا۔
پاکستانی ٹیم 24 ستمبر کی رات جاپان روانہ ہوگی۔ ایشین گیمز کے اہم مقابلوں سے قبل قومی کھلاڑی کراچی میں تربیتی کیمپ کے دوران اپنی تیاریوں کو حتمی شکل دیں گے۔
By 
