شہزادی ڈیانا کے بھائی کی کتاب نے شاہی خاندان میں نئی ہلچل مچادی

برطانیہ کا شاہی خاندان شہزادی ڈیانا کے بھائی ارل چارلس اسپینسر کی نئی کتاب کے اقتباسات سامنے آنے کے بعد ایک بار پھر توجہ کا مرکز بن گیا ہے۔

کتاب میں شاہ چارلس سے متعلق دعوے

چارلس اسپینسر کی کتاب Swan Song کی اشاعت سے قبل سامنے آنے والے اقتباسات میں شاہ چارلس سوم اور شہزادی ڈیانا کی ازدواجی زندگی سے متعلق مختلف دعوے کیے گئے ہیں۔

کتاب میں ڈیانا اور چارلس کی شادی کو ناخوشگوار قرار دیتے ہوئے ان کے تعلقات کے مختلف پہلوؤں کا ذکر کیا گیا ہے۔

منگنی ختم کرنے کی کوشش کا دعویٰ

کتاب کے مطابق شہزادی ڈیانا نے شادی سے قبل منگنی ختم کرنے کی کوشش کی تھی۔ تاہم ان کے والد کی جانب سے اس کی اجازت نہ ملنے کا دعویٰ کیا گیا ہے۔

 یہ بھی پڑھیں :شہزادی ڈیانا پر خفیہ فلم کی تیاری، شہزادہ ہیری کی اہلیہ بھی کہانی کا حصہ بنیں گی

کتاب میں یہ بھی بیان کیا گیا ہے کہ منگنی کے فوراً بعد شاہ چارلس نے ڈیانا کے جسم سے متعلق ایک تبصرہ کیا تھا۔ دعوے کے مطابق اس واقعے نے ڈیانا کو شدید متاثر کیا۔

ڈیانا کی موت کے بعد کے واقعات

چارلس اسپینسر نے کتاب میں 31 اگست 1997 کو شہزادی ڈیانا کی موت کے بعد پیش آنے والے واقعات کا بھی ذکر کیا ہے۔

کتاب میں دعویٰ کیا گیا ہے کہ ڈیانا کی موت کے بعد ایک ٹیلیفون گفتگو میں شاہ چارلس انتہائی خوش محسوس ہو رہے تھے۔ ایک اور گفتگو سے متعلق بھی ایسا ہی دعویٰ کتاب میں شامل کیا گیا ہے۔

ولیم اور ہیری کے بارے میں بھی تفصیلات

کتاب میں شہزادی ڈیانا کے جنازے کے موقع پر شہزادہ ولیم اور شہزادہ ہیری کے تابوت کے پیچھے چلنے کے معاملے کا بھی ذکر کیا گیا ہے۔

 یہ بھی پڑھیں :شہزادی ڈیانا کی موت کا راز؟ بھائی نے کتاب لکھنے کا اعلان کردیا

اسپینسر کے مطابق اس معاملے پر دونوں کے درمیان تلخ بحث ہوئی تھی۔ انہوں نے بعد میں شہزادہ ہیری کی دیکھ بھال کے حوالے سے بھی تشویش ظاہر کی۔

بلیمیا کا بھی ذکر

کتاب میں شہزادی ڈیانا کو درپیش ذہنی اور صحت سے متعلق مشکلات کا بھی ذکر کیا گیا ہے۔ ان میں کھانے کی بیماری بلیمیا کا حوالہ بھی شامل ہے۔

دوسری جانب بکنگھم پیلس کی جانب سے ان اقتباسات پر ردعمل سامنے آیا ہے۔ محل کا کہنا ہے کہ خاندانی غم انسان کی یادداشت اور فیصلوں پر اثر انداز ہوسکتا ہے۔

کتاب کے ناشر پینگوئن رینڈم ہاؤس نے بھی برطانوی میڈیا میں شائع ہونے والے متعلقہ اقتباسات کے درست ہونے کی تصدیق کی ہے۔