عوام کی عدم دلچسپی کے باعث تحریک انصاف کا لانگ مارچ ملتوی کرنے کا فیصلہ

پاکستان تحریک انصاف (پی ٹی آئی) نے 27 ستمبر کو ہونے والا لانگ مارچ مؤخر کرکے 5 اکتوبر کو کرنے کا فیصلہ کرلیا ہے۔

ذرائع کے مطابق پشاور میں پاکستان تحریک انصاف کے اجلاس میں لانگ مارچ کے حوالے سے تفصیلی مشاورت کی گئی، جس کے بعد 27 ستمبر کا لانگ مارچ 5 اکتوبر تک مؤخر کرنے کا فیصلہ کیا گیا۔

ذرائع کا کہنا ہے کہ لانگ مارچ کی نئی تاریخ کے حوالے سے باضابطہ اعلان محمود اچکزئی اور علامہ ناصر کو اعتماد میں لینے کے بعد کیا جائے گا۔

اس سے قبل پی ٹی آئی خیبر پختونخوا کے سیکریٹری اطلاعات شوکت یوسفزئی نے کہا تھا کہ لانگ مارچ ختم کرنے کا کوئی فیصلہ نہیں کیا گیا اور تحریک انصاف لانگ مارچ کے لیے مکمل طور پر تیار ہے۔

شوکت یوسفزئی کا کہنا تھا کہ لانگ مارچ پُرامن ہوگا اور اس میں سرکاری وسائل استعمال نہیں کیے جائیں گے۔ انہوں نے کہا تھا کہ اگر وفاقی حکومت مذاکرات کرتی ہے تو لانگ مارچ کے حوالے سے کوئی فیصلہ ہوسکتا ہے، تاہم اس بار کچھ حاصل کیے بغیر لانگ مارچ ختم نہیں کیا جائے گا۔

پی ٹی آئی رہنما نے مزید کہا تھا کہ تحریک انصاف کو کنٹینرز ہٹانے اور راستے کھولنے کی ضرورت نہیں، جہاں راستہ بند کیا جائے گا وہیں دھرنا دیا جائے گا۔

ذرائع کے مطابق اب پارٹی اجلاس میں 27 ستمبر کے بجائے 5 اکتوبر کو لانگ مارچ کرنے کا فیصلہ کیا گیا ہے، تاہم اس فیصلے کا حتمی اور باضابطہ اعلان متعلقہ سیاسی رہنماؤں کو اعتماد میں لینے کے بعد متوقع ہے۔