By خیبر پختونخوا میں پاکستان تحریک انصاف کی قیادت کے خلاف قومی احتساب بیورو (نیب) کی تحقیقات میں اہم پیش رفت سامنے آئی ہے۔ سابق اسپیکر قومی اسمبلی اسد قیصر اور وزیراعلیٰ خیبر پختونخوا کے معاون خصوصی برائے ہاؤسنگ ڈاکٹر امجد علی سے متعلق اثاثوں کی تحقیقات کے سلسلے میں نیب خیبر پختونخوا نے 13 نومبر 2026 کو مجموعی طور پر 10 نوٹس جاری کر دیے ہیں۔
دستیاب دستاویزات کے مطابق نیب نے اسد قیصر کے خلاف آمدن سے زائد اثاثوں کی انکوائری میں رجسٹرار آف فرمز پشاور سے تفصیلی ریکارڈ طلب کیا ہے، جبکہ ڈاکٹر امجد علی اور دیگر کے خلاف مبینہ کرپشن، بدعنوان طریقوں اور معلوم ذرائع آمدن سے زائد اثاثوں کی تحقیقات میں 9 افراد کو نوٹس جاری کیے گئے ہیں۔
اسد قیصر سے متعلق انکوائری میں نیب خیبر پختونخوا نے قومی احتساب آرڈیننس 1999 کی دفعہ 19 کے تحت رجسٹرار آف فرمز کو مراسلہ ارسال کیا ہے۔ مراسلے میں اسد قیصر، ان کے اہل خانہ اور دیگر متعلقہ افراد سمیت مجموعی طور پر 10 شخصیات کے نام پر رجسٹرڈ کاروباری اداروں اور شراکت داری کی تفصیلات طلب کی گئی ہیں۔
نیب کی جانب سے طلب کیے گئے ریکارڈ میں اسد قیصر، فرح دیبا، زلہ قیصر، حاشر قیصر، عائشہ قیصر، احمد قیصر، مطلوب احمد، عبدالوحید، عاقب اللہ خان اور عدنان خان سے متعلق کاروباری معلومات شامل ہیں۔
دستاویزات کے مطابق نیب نے متعلقہ افراد کے نام پر رجسٹرڈ تمام پارٹنرشپ فرمز، کاروباری شراکت داری، دیگر شراکت داروں کے نام، فرموں کی رجسٹریشن کی تاریخ، کاروباری پتے، پارٹنرشپ ڈیڈز اور رجسٹریشن کے مکمل ریکارڈ کی مصدقہ نقول طلب کی ہیں۔
رجسٹرار آف فرمز کو ہدایت کی گئی ہے کہ مطلوبہ ریکارڈ 20 نومبر 2026 کو نیب خیبر پختونخوا کی کمبائنڈ انویسٹی گیشن ٹیم کو فراہم کیا جائے تاکہ آمدن سے زائد اثاثوں کی انکوائری کو آگے بڑھایا جا سکے۔
دوسری جانب ڈاکٹر امجد علی کے خلاف جاری انکوائری میں نیب نے مختلف سرکاری افسران، کاروباری شخصیات اور دیگر متعلقہ افراد کو بطور گواہ طلب کیا ہے۔ نیب کے نوٹسز کے مطابق انکوائری کا تعلق مبینہ طور پر معلوم ذرائع آمدن سے زائد اثاثے بنانے، کرپشن اور بدعنوان طریقوں سے ہے۔
نیب نے خیبر پختونخوا ہاؤسنگ اتھارٹی کے افسران وہاب خان، عبدالحمید خان اور کرامت علی کو 18 نومبر کو پشاور میں تحقیقاتی افسر کے سامنے پیش ہو کر بیانات ریکارڈ کرانے کی ہدایت کی ہے۔
اسی انکوائری میں محمد طارق کو 17 نومبر کو طلب کیا گیا ہے۔ انہیں پائنیئرز ریذیڈینشیا پرائیویٹ لمیٹڈ، پائنیئرز ٹاؤن پرائیویٹ لمیٹڈ، عربیہ پائنیئرز کرینز ٹریڈنگ اینڈ ٹرانسپورٹ کمپنی پرائیویٹ لمیٹڈ اور پائنیئرز کنسٹرکشن اینڈ ریئل اسٹیٹ کنسلٹنٹس پرائیویٹ لمیٹڈ کے مکمل بینک اکاؤنٹس اور بینک اسٹیٹمنٹس سمیت متعلقہ ریکارڈ فراہم کرنے کی ہدایت کی گئی ہے۔
نیب کی دستاویزات میں اسلام آباد کی ایٹین ہاؤسنگ سوسائٹی میں واقع پراپرٹی نمبر CLG-003 سے متعلق مالی لین دین کی تفصیلات بھی سامنے آئی ہیں۔
نوٹسز کے مطابق نیب نے کاشف علی سے مذکورہ پراپرٹی میں ایک کروڑ روپے، وقار علی سے 60 لاکھ روپے، کامران علی سے 49 لاکھ روپے، ضیاء الرحمان سے 20 لاکھ روپے اور عمران علی سے 15 لاکھ روپے کی ادائیگیوں کے بارے میں وضاحت طلب کی ہے۔
ان پانچ افراد سے متعلق نوٹسز میں مجموعی طور پر 2 کروڑ 44 لاکھ روپے کی ادائیگیوں کا ذکر کیا گیا ہے۔ تاہم دستاویزات میں ان ادائیگیوں کو بذاتِ خود غیر قانونی قرار نہیں دیا گیا بلکہ متعلقہ افراد کو ان لین دین کے بارے میں بیانات ریکارڈ کرانے کے لیے طلب کیا گیا ہے۔
نیب نے عمران علی سے ان کی تعمیراتی کمپنی کا مکمل ریکارڈ، مکمل کیے گئے منصوبوں اور ادائیگیوں کی تفصیلات بھی طلب کی ہیں۔ متعلقہ افراد کو 19 نومبر کو مختلف اوقات میں نیب خیبر پختونخوا کے دفتر میں پیش ہونے کی ہدایت کی گئی ہے۔
اس سلسلے میں نیب نے ڈسٹرکٹ پولیس آفیسر سوات کو بھی مراسلہ ارسال کیا ہے جس میں عمران علی، کامران علی، کاشف علی، وقار علی اور ضیاء الرحمان کو نوٹسز کی تعمیل کرانے اور اس کی رپورٹ 18 نومبر تک فراہم کرنے کی درخواست کی گئی ہے۔
نیب کے جاری کردہ نوٹسز میں واضح کیا گیا ہے کہ تحقیقات میں جان بوجھ کر رکاوٹ ڈالنے، گمراہ کرنے یا عدم تعاون کی صورت میں قومی احتساب آرڈیننس 1999 کی دفعہ 31 کے تحت قانونی کارروائی کی جا سکتی ہے، جس میں 10 سال تک قید کی سزا کا ذکر بھی کیا گیا ہے۔
دستیاب نوٹسز سے ظاہر ہوتا ہے کہ نیب نے اسد قیصر سے متعلق انکوائری میں کاروباری اور شراکت داری کے ریکارڈ کی چھان بین شروع کر رکھی ہے، جبکہ ڈاکٹر امجد علی سے متعلق تحقیقات میں سرکاری افسران، کاروباری اداروں اور جائیدادوں کے مالی لین دین کا جائزہ لیا جا رہا ہے۔
