وزیراعظم شہباز شریف نے ملک بھر کے سرکاری و نجی اسکولوں اور دینی مدارس کے 5 لاکھ ہونہار طلبہ و طالبات کو کروم بکس اور انٹرنیٹ کی سہولت فراہم کرنے کے منصوبے کا باضابطہ آغاز کر دیا۔ اس اقدام کا مقصد طلبہ کو جدید ڈیجیٹل ٹیکنالوجی سے آراستہ کرنا، آن لائن تعلیم تک رسائی بہتر بنانا اور انہیں عالمی سطح پر مسابقت کے قابل بنانا ہے۔
منصوبے کے افتتاح کے موقع پر وزیراعظم شہباز شریف نے کہا کہ پاکستان کے قابل اور ذہین بچے ملک کا حقیقی سرمایہ ہیں اور انہیں بااختیار بنانا حکومت اور معاشرے کی مشترکہ ذمہ داری ہے۔ ان کے مطابق طلبہ کو جدید ٹیکنالوجی اور نئی مہارتیں فراہم کرکے ترقی کے مواقع میں مساوات پیدا کی جا سکتی ہے۔
وزیراعظم نے کہا کہ کروم بکس میرٹ اور قابلیت کی بنیاد پر تقسیم کی جائیں گی تاکہ ذہانت اور صلاحیت غربت یا امارت کی پابند نہ رہے۔ ان کا کہنا تھا کہ حکومت چاہتی ہے کہ ملک کا کوئی بھی باصلاحیت طالب علم وسائل کی کمی کے باعث تعلیم اور ترقی کی دوڑ میں پیچھے نہ رہ جائے۔
انہوں نے بتایا کہ آئندہ دو سال کے دوران 5 لاکھ کروم بکس طلبہ میں تقسیم کی جائیں گی۔ ان کے ساتھ اسکول بیگ اور انٹرنیٹ ڈیوائس بھی فراہم کی جائے گی، جس سے طلبہ گھر بیٹھے آن لائن تعلیم حاصل کرنے اور ڈیجیٹل لائبریریوں سے استفادہ کرنے کے قابل ہوں گے۔
شہباز شریف نے ماضی میں نواز شریف کی قیادت میں میرٹ پر 6 لاکھ لیپ ٹاپ تقسیم کرنے کے اقدام کا ذکر کرتے ہوئے کہا کہ گزشتہ دس برسوں میں طلبہ کو میرٹ کی بنیاد پر لیپ ٹاپ فراہم کیے گئے۔ ان کے مطابق کووڈ 19 کی وبا کے دوران لیپ ٹاپس نے طلبہ کو تعلیم جاری رکھنے اور روزگار کے مواقع حاصل کرنے میں مدد دی۔
وزیراعظم نے منصوبے میں تعاون پر ٹوکیو ٹیکنالوجی کیئر فاؤنڈیشن کو سراہا اور کہا کہ بیرون ملک مقیم پاکستانیوں نے ملک کے بچوں کی تعلیم اور ڈیجیٹل صلاحیتوں کے فروغ کے لیے عطیات دیے ہیں۔ انہوں نے سمندر پار پاکستانی نوجوانوں کو ملک کا قیمتی سرمایہ اور مستقبل کا معمار قرار دیا۔
تعلیمی سہولیات کے حوالے سے وزیراعظم نے دانش اسکولوں کا ذکر کرتے ہوئے کہا کہ ان اداروں میں طلبہ کو رہائش، کھانے، معیاری تعلیم، اسمارٹ بورڈز اور ای لائبریریوں سمیت مختلف سہولیات مفت فراہم کی جا رہی ہیں۔ انہوں نے بتایا کہ ملک بھر میں 27 دانش اسکول زیر تعمیر ہیں۔
شہباز شریف نے کہا کہ حکومت کی ترجیح ہے کہ بچوں کو بہتر تعلیم اور جدید سہولیات فراہم کرکے انہیں باصلاحیت پاکستانی بنایا جائے۔ انہوں نے سید شمس رضا جیسے طلبہ کی مثال دیتے ہوئے کہا کہ مشکلات کے باوجود تعلیم حاصل کرنے اور ملک کی خدمت کا عزم قابلِ تحسین ہے۔
وزیراعظم نے یہ بھی بتایا کہ دینی مدارس کے طلبہ کو پہلے بھی لیپ ٹاپ اسکیموں میں شامل کیا گیا تھا۔ ان کے مطابق کروم بکس طلبہ کے لیے اعلیٰ تعلیم کے حصول کے ساتھ باوقار روزگار کے مواقع پیدا کرنے میں بھی مددگار ثابت ہوں گی۔
اپنے خطاب کے اختتام پر وزیراعظم نے طلبہ پر زور دیا کہ وہ تعلیم پر توجہ دیں اور جدید ٹیکنالوجی سے بھرپور فائدہ اٹھائیں۔ انہوں نے کہا کہ تعلیم ایسا زیور ہے جو انسان کو معاشرے میں ممتاز مقام دلاتا ہے اور ملک کی ترقی میں نوجوانوں کا کردار بنیادی اہمیت رکھتا ہے۔
By 
