سوشل میڈیا پر گھنی اور سیاہ مونچھوں والے ایک نومولود بچے کی ویڈیو وائرل ہونے کے بعد صارفین حیرت میں مبتلا ہوگئے ہیں۔ ویڈیو میں بچے کے اوپری ہونٹ پر نمایاں سیاہ بال دکھائی دیتے ہیں، جس نے انٹرنیٹ صارفین کو دلچسپ تبصرے کرنے پر مجبور کردیا۔
سوشل میڈیا پوسٹس کے مطابق یہ ویڈیو جنوبی امریکی ملک ایکواڈور سے تعلق رکھتی ہے، تاہم بچے اور ویڈیو کے مقام کے بارے میں آزادانہ تصدیق سامنے نہیں آئی۔
ویڈیو دیکھنے کے بعد صارفین نے مزاحیہ تبصروں کی بھرمار کردی۔ ایک صارف نے لکھا کہ یہ بچہ کنڈرگارٹن جانے کے بجائے سیدھا درمیانی عمر کے بحران میں داخل ہوگیا ہے، جبکہ ایک دوسرے صارف نے مذاق کرتے ہوئے کہا کہ بچہ تین بچوں اور دو گھروں کے قرضوں کے ساتھ ریٹائر ہوکر پیدا ہوا ہے۔
صارفین نے بچے کی ایسی مزاحیہ تصاویر بھی بنائیں جن میں اسے فوجی وردی میں سپریم لیڈر کے روپ میں، سگار پکڑے کاروباری شخصیت کے طور پر اور قدیم جنگجو کے لباس میں دکھایا گیا۔
کیا واقعی کوئی بچہ گھنی مونچھوں کے ساتھ پیدا ہوسکتا ہے؟
ویڈیو وائرل ہونے کے بعد یہ سوال بھی اٹھنے لگا کہ کیا نومولود بچوں کے چہرے پر اتنے گھنے سیاہ بال قدرتی طور پر ہوسکتے ہیں؟
طبی معلومات کے مطابق بعض بچوں کے جسم پر پیدائش کے وقت لینوگو نامی انتہائی نرم اور باریک بال موجود ہوتے ہیں۔ یہ بال چہرے، کندھوں، کمر اور جسم کے دوسرے حصوں پر بھی دکھائی دے سکتے ہیں اور عموماً پیدائش کے بعد چند ہفتوں میں ختم ہوجاتے ہیں۔
تاہم، لینوگو کے باریک بال عام طور پر ویڈیو میں دکھائی دینے والی گھنی اور واضح مونچھوں جیسی شکل نہیں رکھتے۔
کیا وائرل ویڈیو مصنوعی ذہانت کا کمال ہے؟
وائرل ویڈیو کی حقیقت جانچنے کے لیے سامنے آنے والی فیکٹ چیک رپورٹ میں ڈیجیٹل ایڈیٹنگ کے ممکنہ شواہد کی نشاندہی کی گئی ہے۔
میڈیا رپورٹ کے مطابق بچے کے چہرے اور سر کی حرکت کے دوران مونچھوں کی شکل میں غیر معمولی تبدیلیاں دکھائی دیتی ہیں۔ اس کے علاوہ مونچھوں پر پڑنے والی روشنی بھی اردگرد کے ماحول سے مطابقت نہیں رکھتی۔
میڈیا رپورٹ میں یہ بھی بتایا گیا ہے کہ ویڈیو کی تصدیق کے لیے کسی اسپتال، ڈاکٹر، طبی ریکارڈ یا بچے کے خاندان کی جانب سے مستند معلومات سامنے نہیں آئیں۔
ان شواہد کی بنیاد پر امکان ظاہر کیا گیا ہے کہ بچہ حقیقی ہوسکتا ہے، لیکن اس کی مونچھیں مصنوعی ذہانت سے بنائے گئے فلٹر یا کسی دوسرے ڈیجیٹل ایڈیٹنگ ٹول کے ذریعے شامل کی گئی ہوں۔
کیا پیدائش کے وقت غیر معمولی بالوں کی کوئی طبی وجہ بھی ہوسکتی ہے؟
طبی ماہرین کے مطابق پیدائشی ہائپرٹرائیکوسس ایک نایاب کیفیت ہے جس میں جسم کے کسی حصے یا پورے جسم پر معمول سے زیادہ بال اگ سکتے ہیں۔
اس کے علاوہ بعض ادویات، خصوصاً مائنوکسڈل ، کے غیر ارادی طور پر جلد سے رابطے کے باعث بھی بچوں میں غیر معمولی بالوں کی نشوونما دیکھی جاسکتی ہے۔ تاہم، اس وائرل ویڈیو کا ان طبی وجوہات سے کوئی ثابت شدہ تعلق سامنے نہیں آیا۔
By 
