پاکستان اور چین کے درمیان دوستی اور سفارتی تعلقات کے 75 برس مکمل ہونے پر دونوں ممالک کے درمیان تعاون کے ایک نئے باب کا آغاز ہونے جا رہا ہے۔ چین پاکستان اقتصادی راہداری (سی پیک) کے تحت آج چائنا پاکستان انفارمیشن کوریڈور کا افتتاح کیا جائے گا، جس کا مقصد میڈیا، تزویراتی ابلاغ، معلومات کے تبادلے، عوامی سفارت کاری اور ثقافتی تعاون کو مزید فروغ دینا ہے۔
سفارتی ذرائع کے مطابق چینی وزارتِ خارجہ کی ترجمان ماؤ ننگ اعلیٰ سطح کے چینی وفد کے ہمراہ پاکستان پہنچ گئی ہیں۔ ہوائی اڈے پر پاکستان میں چین کے سفیر جیانگ زائی ڈونگ، چینی سفارت خانے کے عملے اور پاکستانی حکام نے ان کا استقبال کیا۔
ذرائع کے مطابق ماؤ ننگ کے ہمراہ آنے والے وفد میں چینی وزارتِ اطلاعات اور وزارتِ خارجہ کے حکام شامل ہیں۔ وفد کے دورے کے دوران پاک چین تعلقات، دونوں ممالک کے درمیان ابلاغی تعاون اور سی پیک کے تحت نئے اقدامات پر پیش رفت متوقع ہے۔
چائنا پاکستان انفارمیشن کوریڈور کا افتتاح آج شام وفاقی دارالحکومت اسلام آباد میں پاکستان چائنا فرینڈشپ سینٹر میں منعقد ہونے والی خصوصی تقریب میں کیا جائے گا۔ چینی وزارتِ خارجہ کی ترجمان ماؤ ننگ تقریب میں بطور مہمانِ خصوصی شرکت کریں گی۔ یہ اقدام پاک چین دوستی کے 75 سال مکمل ہونے کی تقریبات اور سی پیک کے تحت تعاون کے سلسلے کا حصہ ہے۔
سفارتی ذرائع کے مطابق انفارمیشن کوریڈور کے قیام کا بنیادی مقصد پاکستان اور چین کے میڈیا اداروں کے درمیان روابط کو مضبوط بنانا اور تزویراتی ابلاغ کے شعبے میں تعاون کو وسعت دینا ہے۔ اس کے ذریعے دونوں ممالک کے درمیان معلومات کے تبادلے، عوامی سفارت کاری اور ثقافتی اشتراک کو فروغ دینے کی کوشش کی جائے گی۔
ماؤ ننگ اپنے وفد کے ہمراہ آج پاکستانی وزارتِ خارجہ کا دورہ بھی کریں گی۔ اس موقع پر ان کی نائب وزیراعظم اور وزیرِ خارجہ اسحاق ڈار سے ملاقات متوقع ہے، جبکہ وزارتِ خارجہ میں ترجمان دفترِ خارجہ سجاد حیدر خان سے بھی ان کی ملاقات ہوگی۔
ذرائع کے مطابق پاکستان اور چین کی وزارتِ خارجہ کے ترجمان اس موقع پر باہمی مشاورت بھی کریں گے۔ ملاقاتوں میں دوطرفہ تعلقات، سفارتی رابطوں اور معلومات و ابلاغ کے شعبوں میں تعاون سے متعلق امور زیرِ بحث آنے کی توقع ہے۔
سفارتی ذرائع کا کہنا ہے کہ چائنا پاکستان انفارمیشن کوریڈور دونوں ممالک کے درمیان میڈیا تعاون کو نئی جہت دینے، باہمی معلومات کی ترسیل بہتر بنانے اور عوامی سطح پر روابط کو مستحکم کرنے کی کوششوں کا حصہ ہے۔ اس اقدام کے ذریعے پاک چین دوستی اور مشترکہ منصوبوں سے متعلق معلومات کے تبادلے کے لیے تعاون کو مزید فروغ دینے پر توجہ دی جائے گی۔
دریں اثنا، ذرائع کے مطابق چین کے ایک اور وفد کے دورۂ پاکستان کو بھی حتمی شکل دی جا رہی ہے، جس سے دونوں ممالک کے درمیان اعلیٰ سطح کے رابطوں اور تعاون کے تسلسل کی عکاسی ہوتی ہے۔
پاک چین سفارتی تعلقات کے 75 سال مکمل ہونے کے موقع پر چائنا پاکستان انفارمیشن کوریڈور کا آغاز دونوں ممالک کے درمیان میڈیا، ابلاغ، عوامی سفارت کاری اور ثقافتی روابط کو مزید مضبوط بنانے کی جانب ایک اہم پیش رفت قرار دیا جا رہا ہے۔
