تصاویر اور آوازوں کے بعد اب خوشبو کی باری، جدید ٹیکنالوجی تیار

سائنسدانوں نے ایک جدید ٹیکنالوجی تیار کی ہے، جس کی مدد سے کسی جگہ موجود خوشبو کو شناخت کرکے دوسری جگہ اس سے ملتی جلتی مہک پیدا کی جاسکتی ہے۔

سینٹرونک نامی اس ٹیکنالوجی میں الیکٹرانک ناک استعمال کی جاتی ہے، جو مختلف خوشبوؤں کو پہچاننے کی صلاحیت رکھتی ہے۔ خوشبو کی شناخت کے بعد یہ نظام جسم پر پہنی جانے والی ایک ریموٹ ڈیوائس کو سگنل بھیجتا ہے، جو مخصوص خوشبو دار سالمات خارج کرکے اس سے ملتی جلتی مہک پیدا کرتی ہے۔

اوہائیو اسٹیٹ یونیورسٹی میں میٹریلز سائنس اینڈ انجینئرنگ کے ڈاکٹریٹ کے طالب علم اور تحقیق کے مرکزی مصنف چُن یو یانگ کے مطابق، اس ٹیکنالوجی کا بنیادی مقصد ایک مقام پر خوشبو کو شناخت کرنے اور کسی دوسرے مقام پر اس جیسی مہک پیدا کرنے کے عمل کو آپس میں جوڑنا ہے۔

یہ بھی پڑھیں:گرمی سے خراب ہونے والے سولر سیلز کا مسئلہ حل، نئی ٹیکنالوجی تیار

محققین کا کہنا ہے کہ اس ٹیکنالوجی کے ذریعے ڈیجیٹل دنیا میں خوشبو کا احساس بھی شامل کیا جاسکتا ہے۔ اس وقت انٹرنیٹ پر تصاویر، ویڈیوز اور آوازیں شیئر کی جاسکتی ہیں، لیکن خوشبو کو ڈیجیٹل تجربے کا حصہ بنانا ایک نیا قدم ہوگا۔

مستقبل میں اس طرح کی ٹیکنالوجی آن لائن رابطوں، ڈیجیٹل تفریح اور ورچوئل تجربات کو مزید حقیقت سے قریب لاسکتی ہے، جہاں صارفین صرف دیکھنے اور سننے کے بجائے مختلف خوشبوؤں کا احساس بھی حاصل کرسکیں گے۔

تاہم، اس ٹیکنالوجی کے عام استعمال اور مختلف اقسام کی خوشبوؤں کو کتنی درستگی سے دوبارہ پیدا کرنے کی صلاحیت کا انحصار مزید تجربات اور عملی ترقی پر ہوگا۔