ستمبر 2026 میں امریکی ریاست فلوریڈا کے شہر پاناما سٹی میں نیشنل اوشینک اینڈ ایٹموسفیرک ایڈمنسٹریشن کی ایک سمندری تحقیقی لیبارٹری میں سائنس دان معمول کے مطابق شارک پر تحقیق کر رہے تھے کہ اچانک انہیں مرکزی دروازے پر بار بار دستک دینے کی آواز سنائی دی۔
جب عملے نے دروازہ کھولا تو سامنے ایک بھورا پیلیکن کھڑا تھا، جو اپنی چونچ سے شیشے پر مسلسل دستک دے رہا تھا۔ قریب سے دیکھنے پر معلوم ہوا کہ پرندہ شدید مشکل میں تھا۔
پیلیکن کے ایک پر میں مچھلی پکڑنے کا کانٹا گہرائی تک پھنسا ہوا تھا، اس کے ایک پاؤں میں کیکٹس کے کانٹے چبھے ہوئے تھے، جبکہ مچھلی پکڑنے والی ڈور اس کے جسم کے گرد لپٹی ہوئی تھی۔
تحقیقی عملے نے فوری طور پر پرندے کی مدد کی اور تقریباً 10 منٹ میں اسے ان تکلیف دہ چیزوں سے نجات دلا دی۔ حیرت انگیز بات یہ تھی کہ پیلیکن پورے عمل کے دوران پرسکون رہا، جیسے اسے یقین ہو کہ اب اسے نقصان نہیں پہنچے گا۔
علاج کے بعد جب پرندہ صحت یاب محسوس کرنے لگا تو اس نے پر پھیلائے اور اڑ کر آزاد فضا میں چلا گیا۔یہ واقعہ اس بات کی یاد دہانی ہے کہ انسانی سرگرمیوں سے پھیلنے والا مچھلی پکڑنے کا سامان جنگلی حیات کے لیے کتنا خطرناک ثابت ہوسکتا ہے۔
By 
