کیا بابا وانگا کی پیشگوئی سچ ہونے والی ہے؟ چین کو خلا سے پراسرار سگنل مل گیا

کیا انسانوں کا پہلی بار خلائی مخلوق سے رابطہ ہونے والا ہے؟ چین کے سائنسدانوں کو دور دراز ستاروں کے نظام سے پراسرار ریڈیو سگنل ملا، سوشل میڈیا پر بابا وانگا کی پیشگوئی ایک بار پھر زیر بحث آگئی۔

بلغاریہ کی مشہور نابینا نجومی بابا وانگا کی  پیشگوئیاں ایک بار پھر سوشل میڈیا پر توجہ حاصل کر رہی ہیں۔ اس بار ان کی طرف منسوب خلائی مخلوق سے متعلق ایک پیشگوئی زیر بحث ہے، جس میں دعویٰ کیا جا رہا ہے کہ نومبر 2026 میں ایک بہت بڑا خلائی جہاز زمین کی فضا میں داخل ہوگا اور انسانوں کا کسی دوسری دنیا کی مخلوق سے پہلی بار رابطہ ہو سکتا ہے۔

بابا وانگا کا تعلق بلغاریہ سے تھا اور انہیں 20ویں صدی کی معروف نجومی شخصیات میں شمار کیا جاتا ہے۔ ان سے منسوب کئی پیشگوئیاں وقتاً فوقتاً عالمی میڈیا اور سوشل میڈیا پر زیر بحث آتی رہی ہیں۔ ان میں جنگوں، قدرتی آفات اور عالمی تبدیلیوں سے متعلق دعوے بھی شامل ہیں۔

یہ بھی پڑھیں:ایران میں حکومت گرانے نکلے تھے ٹرمپ، اب اپنے ہی ملک میں مشکل میں پھنس گئے

تاہم ان کی پیشگوئیوں کی درستگی کے حوالے سے اکثر مستند تاریخی شواہد موجود نہیں ہوتے۔ اب نومبر 2026 میں چین کے سائنسدانوں کی سربراہی میں ایک تحقیقی ٹیم کی جانب سے دریافت کیے گئے پراسرار ریڈیو سگنل نے اس بحث کو مزید ہوا دے دی ہے۔

رپورٹس کے مطابق یہ سگنل زمین سے تقریباً 238 نوری سال کے فاصلے پر واقع ستاروں کے نظام K2-155 کی سمت سے موصول ہوا۔ سائنسدانوں کو یہ سگنل چین کی طاقتور ریڈیو دوربین فاسٹ (FAST) کے پرانے ڈیٹا کا تجزیہ کرتے ہوئے ملا۔

اس سگنل کی ایک خاص بات یہ تھی کہ اس کی فریکوئنسی وقت کے ساتھ تبدیل ہو رہی تھی، جس نے محققین کی توجہ حاصل کی۔

تاہم ماہرین نے واضح کیا ہے کہ اس ریڈیو سگنل کو خلائی مخلوق کی موجودگی کا ثبوت قرار نہیں دیا جا سکتا۔ اس کی اصل وجہ جاننے کے لیے مزید تحقیق اور سائنسی تجزیے کی ضرورت ہے۔

دوسری جانب بابا وانگا سے منسوب نومبر 2026 میں خلائی جہاز کی آمد یا انسانوں کے خلائی مخلوق سے رابطے کی پیشگوئی کا بھی کوئی مستند تاریخی ریکارڈ موجود نہیں ہے۔

یہ بات بھی اہم ہے کہ مذکورہ ریڈیو سگنل 2021 میں ریکارڈ کیے گئے مشاہدات کے پرانے ڈیٹا کے تجزیے سے سامنے آیا ہے۔ اس لیے اسے نومبر 2026 میں کسی خلائی جہاز کی آمد یا خلائی مخلوق سے رابطے کا اشارہ قرار دینا درست نہیں ہوگا۔