فضل الرحمان اینڈ کمپنی نے پنگے خود کیے، اب جب ‘ہرا سمندر گوپی چندر، بول میری مچھلی کتنا پانی’ والا ماحول گرم ہوا تو چیخیں نکل رہی ہیں،فیاض الحسن چوہان

سینئر سیاستدان فیاض الحسن چوہان نے کہا ہے کہ ہم آپریشن کے مخالف ہیں کہنے والوں کو دہشت گردی کے خاتمے کے لیے متبادل حل بھی پیش کرنا چاہیے۔ انہوں نے مولانا فضل الرحمان اور ان کے خاندان کو مخاطب کرتے ہوئے آزادی مارچ کے فنڈز، کشمیر کمیٹی کے اخراجات، بیرونی دوروں، کم عمری کی شادیوں کے بل، دورہ کابل، افغان طالبان قیادت سے روابط، جائیدادوں اور ٹیکسوں سمیت متعدد معاملات پر سوالات اٹھا دیے۔

فیاض الحسن چوہان نے کلرک بابو ضیاء الرحمان کی جانب سے بنائی گئی ویڈیو پر گفتگو کرتے ہوئے کہا کہ اس ویڈیو میں ریاست، اداروں، ملک اور قوم کو آنکھیں دکھانے کی کوشش کی گئی ہے۔ انہوں نے ضیاء الرحمان کو مخاطب کرتے ہوئے کہا کہ پہلے اپنا ماضی بتاؤ، تم پر کرپشن، بددیانتی اور دیگر معاملات کے حوالے سے سوالات موجود ہیں، تمہاری بنیاد ہی دو نمبر ہے اور گزشتہ چھ سال کی زندگی کے بارے میں بھی وضاحت ہونی چاہیے۔ انہوں نے سوال اٹھایا کہ آخر کسی کو یہ جرات کیسے ہوسکتی ہے کہ وہ مصنوعی ذہانت اور ویڈیوز کے ذریعے ریاست اور اداروں کو آنکھیں دکھائے۔ ان کا کہنا تھا کہ کیا یہ سمجھا جارہا ہے کہ اے آئی ویڈیوز بنا کر ریاست کو جھکایا جاسکتا ہے؟

فیاض الحسن چوہان نے مولانا فضل الرحمان کے فوجی آپریشنز کی مخالفت کے مؤقف پر سوال اٹھاتے ہوئے کہا کہ اگر مولانا آپریشنز کے مخالف ہیں تو پھر دہشت گردی کے خاتمے کا حل بھی بتائیں۔ انہوں نے کہا کہ ایک سیاسی اور مذہبی رہنما کی حیثیت سے مولانا کی ذمہ داری ہے کہ وہ عوام کو مثبت انداز میں اس مسئلے پر آگاہ کریں اور انہیں متبادل راستہ دکھائیں، لیکن ان کے بقول وہ نہ عوام کو اس حوالے سے ایجوکیٹ کرنے کے لیے تیار ہیں اور نہ ہی کوئی حل پیش کررہے ہیں۔ ان کا کہنا تھا کہ ریاست اور حکومت سے یہ توقع رکھنا کہ وہ دہشت گردی کا سدباب بھی نہ کرے اور آپریشن بھی نہ کرے، مناسب مؤقف نہیں۔

انہوں نے کہا کہ گزشتہ ڈیڑھ سے دو ماہ کے دوران پورے خاندان نے خود تنازعات پیدا کیے، فوج اور اسٹیبلشمنٹ سے محاذ آرائی کی اور شہداء کی تذلیل کی۔ مسلسل پنگے بازی کے بعد جب جواب آنا شروع ہوا، انسپیکشن شروع ہوئی اور مختلف معاملات کی جانچ پڑتال ہونے لگی تو اب چیخ و پکار شروع کردی گئی ہے۔ اسی تناظر میں انہوں نے طنزیہ انداز میں کہا: ’’ہرا سمندر، گوپی چندر، بول میری مچھلی کتنا پانی‘‘۔ ان کا کہنا تھا کہ اب اے آئی کے ذریعے ویڈیوز بنا بنا کر لوگوں کو گمراہ کرنے کی کوشش کی جارہی ہے۔

فیاض الحسن چوہان نے کہا کہ ایک طرف کلرک بابو ضیاء الرحمان کی ویڈیوز سامنے آرہی ہیں تو دوسری طرف این سی سی آئی اے بھی مختلف معاملات کے بارے میں پوچھ گچھ کررہی ہے۔ انہوں نے امان اللہ، جاوید اقبال، گلبرگ گرین، جی ایس فور کی 83 نمبر اسٹریٹ، 84 نمبر اسٹریٹ، مکان نمبر 7 اور 11 سمیت مختلف معاملات کا ذکر کیا۔ انہوں نے مفتی محمود مرکز کے حوالے سے پشاور رنگ روڈ پر 52 فٹ کی انکروچمنٹ کا معاملہ بھی اٹھایا اور کہا کہ ان تمام معاملات پر وضاحت سامنے آنی چاہیے۔

2019 کے آزادی مارچ کے فنڈز کا حساب مانگ لیا

فیاض الحسن چوہان نے مولانا فضل الرحمان سے پہلا سوال 2019 کے آزادی مارچ کے فنڈز کے حوالے سے کیا۔ انہوں نے کہا کہ آزادی مارچ کے لیے ایک ارب 10 کروڑ روپے جمع کیے گئے تھے اور ان کے مطابق رپورٹ میں بتایا گیا کہ اس میں سے صرف 50 کروڑ روپے خرچ ہوئے، باقی رقم کہاں گئی؟ انہوں نے کہا کہ آزادی مارچ کے نام پر 70 سے 80 کروڑ روپے کی خرد برد کے معاملے کا حساب دیا جائے۔

انہوں نے مزید الزام عائد کیا کہ آزادی مارچ کے دوران کراچی سے شروع ہوکر پشاور اور راولپنڈی تک اربوں روپے مالیت کی نان کسٹم پیڈ گاڑیاں بھی بڑی تعداد میں منتقل اور اسمگل کی گئیں۔ انہوں نے مطالبہ کیا کہ اس معاملے کی بھی وضاحت کی جائے اور بتایا جائے کہ ان گاڑیوں کے حوالے سے کیا تفصیلات ہیں۔

فیاض الحسن چوہان نے مولانا فضل الرحمان کے ساتھ موجود مذہبی رہنماؤں اور دیگر افراد کو بھی مخاطب کرتے ہوئے کہا کہ انہیں اپنے قائد سے سوال کرنا چاہیے۔ ان کا کہنا تھا کہ حضرت عمر فاروق رضی اللہ تعالیٰ عنہ کے دور میں ایک بدو نے بھی سوال کیا تھا، لہٰذا مولانا کے ساتھیوں کو بھی آزادی مارچ کے فنڈز اور دیگر معاملات پر ان سے جواب طلب کرنا چاہیے۔

کشمیر کمیٹی کے 48 کروڑ کے بیرونی دوروں پر سوالات

فیاض الحسن چوہان نے دوسرا سوال کشمیر کمیٹی کے سابق چیئرمین کی حیثیت سے مولانا فضل الرحمان کے بیرونی دوروں اور اخراجات کے حوالے سے اٹھایا۔ انہوں نے کہا کہ 2020 میں پبلک اکاؤنٹس کمیٹی کے اندر یہ تفصیلات سامنے آئی تھیں کہ مولانا فضل الرحمان نے بیرونی دوروں پر 48 کروڑ روپے خرچ کیے جبکہ کھانے پینے پر بھی 50 کروڑ روپے خرچ ہونے کا معاملہ سامنے آیا تھا۔

انہوں نے سوال کیا کہ ان اخراجات کا مکمل حساب کتاب دیا جائے کہ یہ رقم کہاں اور کس مد میں خرچ ہوئی؟ انہوں نے این سی سی آئی اے سے بھی مطالبہ کیا کہ ان معاملات کے حوالے سے پوچھ گچھ کی جائے۔

فیاض الحسن چوہان نے ضیاء الرحمان کو مخاطب کرتے ہوئے کہا کہ وہ ان سوالات پر بھی ایک ویڈیو بنائیں تاکہ عوام کو ان معاملات کے بارے میں معلوم ہوسکے۔ انہوں نے بیرونی دوروں کے حوالے سے امریکہ، برطانیہ، یورپ، متحدہ عرب امارات اور دبئی کا ذکر کرتے ہوئے دعویٰ کیا کہ ان دوروں سے متعلق آڈیو، ویڈیوز اور فائلیں قومی اور بین الاقوامی ایجنسیوں کے پاس موجود ہیں۔ انہوں نے مطالبہ کیا کہ ان معاملات کا بھی حساب دیا جائے۔

کم عمری کی شادیوں کے بل پر مذہبی رہنمائی کیوں نہیں کی؟

فیاض الحسن چوہان نے تیسرا سوال 2025 میں کم عمری کی شادیوں کے حوالے سے پیش کیے جانے والے بل پر اٹھایا۔ انہوں نے کہا کہ مولانا فضل الرحمان ایک مذہبی رہنما کی حیثیت سے اس معاملے پر قوم کو مناسب رہنمائی فراہم کرسکتے تھے، لیکن انہوں نے اپنا واضح مؤقف پیش نہیں کیا۔

ان کا کہنا تھا کہ اسلام کے نظام فقہ میں قرآن، حدیث، اجماع اور استحسان و قیاس کے اصول موجود ہیں جبکہ فقہ کے چار بڑے مکاتب فکر حنفی، مالکی، شافعی اور حنبلی ہیں۔ انہوں نے کہا کہ ان اصولوں کو استعمال کرتے ہوئے موجودہ دور کے تقاضوں کے مطابق قوم کو رہنمائی دی جاسکتی تھی کہ کم عمر بچیوں کی شادی نہیں ہونی چاہیے بلکہ بالغ ہونے اور ایک مخصوص عمر تک پہنچنے کے بعد ہی شادی ہونی چاہیے۔

فیاض الحسن چوہان نے سوال کیا کہ مولانا فضل الرحمان نے اس معاملے پر واضح رہنمائی کیوں نہیں دی؟ ان کا کہنا تھا کہ ہر معاملے پر مؤقف اختیار کرنے کے بجائے اس مسئلے پر خاموشی اختیار کی گئی تاکہ یورپ، امریکہ، برطانیہ، مغرب اور مشرق سمیت مختلف حلقوں کے ساتھ معاملات چلتے رہیں۔

دورہ کابل اور ٹی ٹی پی کے معاملے پر بھی جواب طلب

فیاض الحسن چوہان نے چوتھا سوال جنوری 2024 میں مولانا فضل الرحمان کے دورہ کابل کے حوالے سے اٹھایا۔ انہوں نے کہا کہ اس وقت پاکستان میں تحریک طالبان پاکستان کی جانب سے دہشت گردی، قتل و غارت گری اور خودکش حملوں کا سلسلہ جاری تھا جبکہ پاکستان کی سول اور فوجی تنصیبات اور اہلکاروں پر حملے بھی کیے جارہے تھے۔

انہوں نے سوال کیا کہ کیا مولانا فضل الرحمان نے کابل میں افغان طالبان قیادت سے ملاقات کے دوران بطور پاکستانی سیاسی رہنما ٹی ٹی پی کی سرگرمیوں کو روکنے اور پاکستان میں دہشت گردی کے خاتمے کے حوالے سے کوئی بات کی؟ انہوں نے کہا کہ افغان طالبان کی بھی ذمہ داری بنتی تھی کہ وہ ٹی ٹی پی کو کنٹرول کرنے کے لیے اقدامات کرتے۔

فیاض الحسن چوہان نے اپنے بیان میں یہ دعویٰ بھی کیا کہ مولانا فضل الرحمان کے دورے کے بعد افغان طالبان قیادت کا جھکاؤ بھارتی اسٹیبلشمنٹ، بھارتی خفیہ ایجنسی را اور اجیت ڈوول کی جانب ہوگیا۔ انہوں نے سوال کیا کہ مولانا کے دورے اور ملاقاتوں کے بعد ہونے والی پیش رفت اور ان رابطوں کی تفصیلات کیا ہیں؟

ہیبت اللہ اخوندزادہ سے روابط پر بھی سوال

فیاض الحسن چوہان نے پانچواں سوال افغان طالبان کے سربراہ ہیبت اللہ اخوندزادہ کے ساتھ مولانا فضل الرحمان کے روابط کے حوالے سے اٹھایا۔ انہوں نے الزام عائد کیا کہ افغان طالبان قیادت اور ان کی حکومت کے بھارت کی را، اسرائیلی موساد اور امریکی سی آئی اے کے ساتھ روابط ہیں اور خطے میں بالخصوص پاکستان کے خلاف سرگرمیاں جاری ہیں۔

انہوں نے مولانا فضل الرحمان سے سوال کیا کہ ہیبت اللہ اخوندزادہ کے ساتھ ان کے کیا معاملات ہیں اور ان کے درمیان کس نوعیت کے روابط موجود ہیں؟ انہوں نے مطالبہ کیا کہ ان رابطوں اور ملاقاتوں کے حوالے سے بھی وضاحت سامنے آنی چاہیے۔

ریاست اور قانون کی اطاعت کا معاملہ

فیاض الحسن چوہان نے اپنے بیان میں مولانا فضل الرحمان کو مخاطب کرتے ہوئے قرآن مجید کی آیت ’’أطيعُوا اللَّهَ وَأطيعُوا الرَّسُولَ وَأُولِي الْأَمْرِ مِنْكُمْ‘‘ کا حوالہ دیا اور کہا کہ اس کا مفہوم ہے کہ اے ایمان والو! اللہ کی اطاعت کرو، رسول کی اطاعت کرو اور اپنے حکمرانوں کی اطاعت کرو۔

انہوں نے کہا کہ ریاست حاکم اور حکمران ہے اور ہر شہری کو اسلامی، شرعی اور قانونی طور پر ریاست کے سامنے جواب دہ ہونا چاہیے۔ ان کا کہنا تھا کہ جس ریاست کے ذریعے مولانا فضل الرحمان قائد حزب اختلاف بنتے ہیں، ایم این اے، ایم پی اے، وزیر، مشیر اور گورنر کے عہدے حاصل کرتے ہیں اور اپنے خاندان کے افراد کو بھی مختلف سرکاری عہدوں پر پہنچاتے ہیں، اسی ریاست کے سامنے جواب دہی سے انکار نہیں کیا جاسکتا۔

فیاض الحسن چوہان نے الزام عائد کیا کہ مولانا فضل الرحمان کا خاندان ریاستی نظام سے مختلف عہدے اور مراعات حاصل کرتا رہا ہے، لیکن جب ریاست کی جانب سے مالی معاملات، جائیدادوں اور دیگر امور کے بارے میں سوال کیا جاتا ہے تو جواب دینے کے بجائے آنکھیں دکھائی جاتی ہیں۔ ان کا کہنا تھا کہ اگر کسی پر مالی بے ضابطگیوں یا بے نامی جائیدادوں کے حوالے سے سوالات اٹھائے جائیں تو اسے متعلقہ اداروں کے سامنے جواب دینا چاہیے۔

انہوں نے کہا کہ مولانا فضل الرحمان کے بیٹے کو بھی طلب کیا گیا تھا اور یہ بالکل اسی طرح کا معاملہ ہے جس طرح حضرت عمر فاروق رضی اللہ تعالیٰ عنہ کے دور میں ایک بدو نے سوال کیا تھا۔ ان کا کہنا تھا کہ ریاست کی جانب سے طلب کیے جانے پر متعلقہ افراد کو اپنی جائیدادوں اور مالی معاملات کی تفصیلات فراہم کرنی چاہئیں۔

فیاض الحسن چوہان نے کہا کہ کوئی شخص ریاست کے ذریعے گورنری، وزارت اعلیٰ، حکومتیں، وزارتیں، مشاورتیں اور پارلیمانی عہدے حاصل کرے، اپنے خاندان کے افراد کو بھی مختلف عہدوں پر پہنچائے، لیکن جب ریاست اس سے پوچھے کہ یہ جائیدادیں اور اثاثے کہاں سے بنائے تو وہ جواب دینے کے بجائے آنکھیں دکھانے لگے، ایسا نہیں ہوسکتا۔

انہوں نے مزید کہا کہ مصنوعی ذہانت کی ویڈیوز یا کلرک بابو ضیاء الرحمان کی چالاکیاں ریاستی جواب دہی سے کسی کو نہیں بچا سکتیں اور ریاست اپنے سوالات ضرور کرے گی۔

ٹیکسوں کے معاملے پر مولانا فضل الرحمان کے ریکارڈ کا حوالہ

فیاض الحسن چوہان نے اپنے بیان کے آخری حصے میں ٹیکسوں کے معاملے پر مولانا فضل الرحمان کو مخاطب کرتے ہوئے کہا کہ عوام کے ٹیکسوں کے پیسے کی بات کرنے سے پہلے اپنے ٹیکس ریکارڈ کا بھی جواب دینا چاہیے۔

انہوں نے دعویٰ کیا کہ 2013 میں مولانا فضل الرحمان نے 13 ہزار روپے جبکہ 2014 میں 16 ہزار روپے ٹیکس جمع کرایا تھا۔ انہوں نے سوال کیا کہ اتنی کم ٹیکس ادائیگی کے بعد عوام کے ٹیکسوں کے پیسے کی بات کس بنیاد پر کی جارہی ہے؟

فیاض الحسن چوہان نے کہا کہ مولانا فضل الرحمان کو خود بھی اپنے ٹیکس معاملات کی وضاحت کرنی چاہیے۔ انہوں نے اپنے بارے میں بتایا کہ وہ خود ایک عام اور اپر مڈل کلاس سے تعلق رکھنے والے شخص ہیں لیکن ان کا ٹیکس مولانا فضل الرحمان کی بیان کردہ ٹیکس ادائیگی سے دس گنا زیادہ ہے۔

انہوں نے طنزیہ انداز میں کہا کہ پاکستان کے ایف بی آر کی مجموعی ٹیکس وصولیوں میں سے 50 فیصد ٹیکس مولانا فضل الرحمان کا خاندان دیتا ہے، جس پر انہوں نے مولانا کے ٹیکس ریکارڈ اور عوام کے ٹیکسوں کے حوالے سے دیے جانے والے بیانات پر سوالات اٹھائے۔

آخر میں فیاض الحسن چوہان نے کلرک بابو ضیاء الرحمان سے مطالبہ کیا کہ ان کی جانب سے اٹھائے گئے تمام سوالات پر بھی مصنوعی ذہانت کے ذریعے ایک ویڈیو بنائی جائے اور عوام کے سامنے لائی جائے تاکہ ان سوالات اور اٹھائے گئے معاملات پر بھی لوگوں کو آگاہی حاصل ہوسکے۔