دنیا کی بڑی ٹیک کمپنی میں ہلچل، جینسن ہوانگ نے عہدہ چھوڑ دیا

دنیا کی معروف ٹیکنالوجی کمپنی اینویڈیا کے شریک بانی اور چیف ایگزیکٹو آفیسر جینسن ہوانگ نے اپنے عہدے سے استعفیٰ دے دیا ہے۔

 ان کے استعفے کے ساتھ ہی کمپنی میں ان کا 33 سالہ دور بھی ختم ہوگیا ہے۔ یہ پیش رفت ان کے2  تعلقات سے متعلق خبروں کے بعد سامنے آئی ہے۔

اینویڈیا نے جمعرات کو قیادت میں تبدیلی کا باضابطہ اعلان کیا۔ کمپنی کے مطابق جینسن ہوانگ نے فوری طور پر صدر، چیف ایگزیکٹو آفیسر اور بورڈ کی رکنیت سے استعفیٰ دے دیا ہے۔

کمپنی کی چیف فنانشل آفیسر کولیٹ کریس کو عبوری چیف ایگزیکٹو آفیسر مقرر کیا گیا ہے۔ وہ نئے مستقل سربراہ کی تلاش مکمل ہونے تک یہ ذمہ داری سنبھالیں گی، جبکہ مالی امور کی سربراہی بھی ان کے پاس رہے گی۔ کمپنی کے بورڈ نے مستقل چیف ایگزیکٹو کی تلاش شروع کر دی ہے۔

یہ بھی پڑھیں:ٹرمپ نے نائب صدر جے ڈی وینس کو ایران امن مذاکرات سے ہٹا کر امریکا کے داخلی معاملات پر توجہ دینے کی ہدایت کر دی

جینسن ہوانگ کے استعفے کی وجہ ان کے 2 تعلقات سے متعلق رپورٹس کو قرار دیا جا رہا ہے۔ میڈیا رپورٹس کے مطابق ان میں سے ایک تعلق سنگاپور کی ڈیٹا کمپنی میگاسپیڈ سے وابستہ کاروباری شخصیت ایلس ہوانگ سے تھا۔

میڈیا رپورٹس میں دعویٰ کیا گیا ہے کہ امریکی انٹیلی جنس حکام کو ایلس ہوانگ کے چین کی انٹیلی جنس سے ممکنہ روابط پر شبہ تھا۔ تاہم یہ الزامات اپنی نوعیت کے سنگین دعوے ہیں اور انہیں ثابت شدہ حقیقت کے طور پر پیش نہیں کیا جا سکتا۔

دوسرا تعلق اینویڈیا کی ایک سینئر خاتون ملازمہ سے بتایا جا رہا ہے، جو براہ راست جینسن ہوانگ کو رپورٹ کرتی تھیں۔ نیویارک ٹائمز کی سابقہ رپورٹ کے مطابق اس خاتون کی شناخت کمپنی کے ہیلتھ کیئر بزنس کی سربراہ کمبرلی پاول کے طور پر کی گئی تھی۔

واضح رہے کہ اینویڈیا کی جانب سے باضابطہ طور پر جینسن ہوانگ کے استعفے کی تصدیق کی گئی ہے، جبکہ ان کے مستعفی ہونے اور انہیں عہدے سے ہٹائے جانے سے متعلق میڈیا رپورٹس میں مختلف دعوے سامنے آئے تھے۔