مصنوعی ذہانت کے مقبول چیٹ بوٹس چیٹ جی پی ٹی، گوگل جیمنائی اور پرپلیکسٹی کے حوالے سے ایک نئی تحقیق نے آن لائن خریداری کرنے والے صارفین کے لیے تشویش پیدا کردی ہے۔ تحقیق کے مطابق تینوں اے آئی پلیٹ فارمز نے مصنوعات خریدنے کے لیے ایسی ویب سائٹس بھی تجویز کیں جو ممکنہ طور پر جعلی، غیر محفوظ یا مشکوک تھیں۔
دانشورانہ ملکیت کے تحفظ سے متعلق ادارے پوڈکی کی تحقیق میں 6 ہزار 795 جوابات کا جائزہ لیا گیا، جن میں تقریباً 9 فیصد جوابات میں کسی نہ کسی خطرناک ویب سائٹ کا ذکر موجود تھا۔ ان میں جعلی آن لائن اسٹورز، مبینہ طور پر نقلی مصنوعات فروخت کرنے والی ویب سائٹس اور غیر فعال یا دوبارہ رجسٹر کیے گئے برانڈ ڈومینز شامل تھے۔
کس اے آئی پلیٹ فارم نے سب سے زیادہ مشکوک ویب سائٹس دکھائیں؟
تحقیق کے مطابق پرپلیکسٹی نے اپنے 15 فیصد جوابات میں مشکوک ویب سائٹس کا ذکر کیا، جبکہ چیٹ جی پی ٹی میں یہ شرح 8 فیصد اور گوگل جیمنائی میں 4 فیصد ریکارڈ کی گئی۔
تحقیق میں کسی ویب سائٹ کو اس وقت بھی شمار کیا گیا جب اے آئی چیٹ بوٹ نے اسے خریداری کے لیے تجویز کیا، بغیر کسی وضاحت کے اس کا نام بتایا یا صارفین کو اس سے خبردار کیا۔
دلچسپ بات یہ ہے کہ چیٹ جی پی ٹی نے مشکوک ویب سائٹس کی نشاندہی کرنے والے جوابات میں سب سے زیادہ احتیاطی انتباہات بھی دیے۔ ایسے جوابات میں 24 فیصد کے ساتھ صارفین کو ممکنہ خطرے سے آگاہ کیا گیا۔
مجموعی طور پر تینوں پلیٹ فارمز کے ایسے جوابات میں جن میں مشکوک ویب سائٹس سامنے آئیں، 57 فیصد میں انہیں خریداری کے لیے تجویز کیا گیا، 34 فیصد میں صرف ذکر کیا گیا جبکہ 9 فیصد میں صارفین کو ان سے دور رہنے کا مشورہ دیا گیا۔
پوڈکی نے مجموعی طور پر 4 ہزار 437 ویب ڈومینز کا جائزہ لیا، جن میں سے 718 کو خطرناک قرار دیا گیا۔ ان میں 351 جعلی ویب سائٹس جبکہ 367 غیر فعال ویب سائٹس تھیں۔
علاقائی ویب سائٹس کے حوالے سے خطرہ زیادہ
تحقیق میں یہ بھی سامنے آیا کہ بین الاقوامی شپنگ اور مختلف ممالک کے لیے مخصوص آن لائن اسٹورز سے متعلق سوالات میں مشکوک ویب سائٹس سامنے آنے کی شرح سب سے زیادہ، یعنی 16 فیصد تھی۔
بعض مواقع پر اے آئی چیٹ بوٹس نے ایسے برانڈز کے لیے جعلی علاقائی ویب سائٹس بھی پیش کردیں جن کے اصل میں ایسے کوئی اسٹور موجود نہیں تھے۔
ایک مثال میں پرپلیکسٹی نے معروف برانڈ اسٹوسی کی غلط ویب سائٹ کو اس کا آفیشل اسٹور قرار دیتے ہوئے صارفین کو وہاں سے اصل مصنوعات خریدنے کا مشورہ دیا۔
تحقیق کے مطابق چھوٹے برانڈز کے بارے میں پوچھے گئے سوالات میں بڑے برانڈز کے مقابلے میں مشکوک ویب سائٹس سامنے آنے کے امکانات تقریباً دو گنا زیادہ تھے۔
کمپنیوں کا مؤقف کیا ہے؟
میڈیا رپورٹ سامنے آنے کے بعد گوگل، اوپن اے آئی اور پرپلیکسٹی نے بھی اپنا مؤقف پیش کیا۔گوگل کی ترجمان جیسیکا لیوس بورڈ کے مطابق جیمنائی سے غلطیاں ہوسکتی ہیں، تاہم صارفین کو جوابات کے ساتھ ذرائع کے لنکس بھی فراہم کیے جاتے ہیں تاکہ وہ معلومات کی تصدیق کرسکیں۔
اوپن اے آئی کی ترجمان ٹایا کرسچینسن کا کہنا تھا کہ کمپنی اپنے حفاظتی نظام کو بہتر بنانے پر کام کر رہی ہے تاکہ خریداری کے نتائج میں دھوکا دہی پر مبنی ویب سائٹس سامنے آنے کے امکانات کم کیے جاسکیں۔
دوسری جانب پرپلیکسٹی کے ترجمان جیسی ڈوائر نے دیگر تحقیقی معیار پر پلیٹ فارم کی کارکردگی کا حوالہ دیتے ہوئے کہا کہ کمپنی سو فیصد درست نتائج کی ضمانت نہیں دیتی۔
آن لائن خریداری کرنے والوں کے لیے اہم ہدایت
یہ تحقیق ایسے وقت میں سامنے آئی ہے جب دنیا بھر میں تعطیلات اور خریداری کے سیزن کے دوران صارفین کم قیمتوں اور دستیاب مصنوعات کی تلاش میں مختلف ویب سائٹس کا رخ کرتے ہیں۔
پوڈکی کے شریک بانی اور چیف ایگزیکٹو ٹریور ویسٹ نے صارفین کو مشورہ دیا ہے کہ کسی بھی ویب سائٹ پر ذاتی معلومات یا ادائیگی کی تفصیلات درج کرنے سے پہلے اس کی اصلیت ضرور جانچیں۔
خاص طور پر مختلف ممالک کے لیے مخصوص آن لائن اسٹورز تلاش کرتے وقت صارفین کو چاہیے کہ وہ پہلے متعلقہ برانڈ کی آفیشل ویب سائٹ پر جائیں اور وہاں سے علاقائی اسٹور کا لنک حاصل کریں۔
یہ تحقیق واضح کرتی ہے کہ مصنوعی ذہانت معلومات تلاش کرنے میں مددگار ضرور ہے، لیکن آن لائن خریداری سے پہلے ویب سائٹ کی تصدیق کرنا اب بھی صارف کی اپنی ذمہ داری ہے۔
By 
