مقبوضہ کشمیر میں قابض بھارت کی ریاستی دہشتگردی کا سلسلہ جاری ہے۔ بھارتی فوج نے ضلع کلگام میں مزید پانچ کشمیری نوجوانوں کو شہید کر دیا۔
کشمیر میڈیا سروس کے مطابق، قابض بھارتی فوج نے کلگام میں محاصرے اور تلاشی کی کارروائی کے دوران ان نوجوانوں کو شہید کیا۔ اسی ہفتے بھارتی فوج کے مظالم سے شہید ہونے والے کشمیری نوجوانوں کی تعداد دس ہو چکی ہے۔
دوسری جانب کل جماعتی حریت کانفرنس نے پانچ اگست کو مقبوضہ کشمیر میں مکمل ہڑتال کی کال دی ہے۔ حریت کانفرنس کا کہنا ہے کہ کشمیری عوام پانچ اگست کو مکمل ہڑتال کر کے دنیا کو یہ واضح پیغام دیں گے کہ وہ پانچ اگست دو ہزار انیس کو بھارت کے جانب سے کیے گئے غیر قانونی اقدامات کو تسلیم نہیں کرتے۔
حریت کانفرنس کا کہنا ہے کہ پانچ اگست کشمیریوں کے لیے سیاہ ترین دنوں میں سے ایک ہے، جس دن بھارت نے ان کی منفرد حیثیت اور شناخت کو چھین لیا تھا۔
حریت کانفرنس اور دیگر آزادی پسند تنظیموں نے سرینگر اور مقبوضہ وادی کے مختلف علاقوں میں پوسٹرز چسپاں کیے ہیں جن میں پانچ اگست دو ہزار انیس کے بھارتی اقدامات کو مسترد کیا گیا ہے۔ ان پوسٹرز میں ان اقدامات کو واپس لینے، سیاسی قیدیوں کی رہائی اور مسئلہ کشمیر کو اقوام متحدہ کی قراردادوں کے مطابق حل کرنے کا مطالبہ کیا گیا ہے۔
واضح رہے کہ بھارتی حکومت نے پانچ اگست دو ہزار انیس کو یکطرفہ طور پر مقبوضہ کشمیر کی خصوصی حیثیت ختم کر دی تھی۔
By 
