برطانیہ میں ملازمت کے حصول کے خواہشمند پاکستانیوں کے لئے اہم خبر

برطانوی حکومت نے غیر ملکی ملازمین کے لیے ورک ویزا کی انگریزی زبان سے متعلق شرائط مزید سخت کر دی ہیں۔ اب اسکلڈ ورکر، اسکیل اپ اور ہائی پوٹینشل انفرادی (HPI) ویزا کے لیے درخواست دینے والوں کو B2 لیول یا اے لیول (A-Level) درجے کی انگریزی زبان کی مہارت ثابت کرنا ہوگی۔

تفصیلات کے مطابق برطانوی ہوم آفس کا کہنا ہے کہ یہ اقدام اس مقصد کے تحت کیا گیا ہے کہ ملک میں آنے والے افراد برطانوی معاشرے میں بہتر طور پر گھل مل سکیں اور مؤثر انداز میں بات چیت کر سکیں۔

نئی پالیسی کے نتیجے میں اندازہ ہے کہ درمیانے درجے کے ہنرمند اور ٹیکنیکل ورکرز کی آمد میں سالانہ ایک لاکھ تک کمی آسکتی ہے۔

ماہرین کا کہنا ہے کہ B2 لیول کی انگریزی پیشہ ورانہ سطح پر کام کرنے کے لیے ضروری ہے، تاہم ناقدین کے مطابق یہ سخت شرائط برطانیہ کی ورک فورس پر منفی اثر ڈال سکتی ہیں۔

حکام نے عندیہ دیا ہے کہ مستقبل میں دیگر ویزا اقسام کے لیے بھی زبان کے نئے تقاضے متعارف کرائے جا سکتے ہیں، جس سے برطانوی امیگریشن نظام میں بڑی تبدیلی کا امکان ہے۔

یہ بھی پڑھیں: برطانیہ کے لیے پی آئی اے کے فلائٹ آپریشنز کی بحالی — لندن میں شاندار تقریب کا انعقاد

دوسری جانب برطانیہ نے اسٹینڈرڈ ویزٹر ویزا کے لیے بھی نئی گائیڈ لائنز جاری کر دی ہیں۔ یہ ویزا سیاحت، کاروبار، خاندانی ملاقات، قلیل مدتی تعلیم یا علاج معالجے کے لیے جاری کیا جاتا ہے، جس کے تحت زیادہ سے زیادہ چھ ماہ قیام کی اجازت ہوگی۔

ویزٹر ویزا کی فیس £127 سے شروع ہو کر £1,059 تک مقرر کی گئی ہے، جبکہ تیز تر کارروائی کے لیے پریارٹی سروس £500 اور سپر پریارٹی سروس £1,000 میں دستیاب ہے۔

امیگریشن حکام نے خبردار کیا ہے کہ ویزٹر ویزا کو طویل قیام یا ملازمت کے مقصد کے لیے استعمال نہ کیا جائے، بصورت دیگر درخواست مسترد کی جا سکتی ہے۔