امریکی انتخابات نے بدلی عالمی معیشت کی پرواز، بٹ کوائن اور سونے نے مارکیٹ ہلا دی

امریکا میں وسط مدتی انتخابات کے دوران ری پبلکن پارٹی کی غیر متوقع شکست کے بعد عالمی مالیاتی بازاروں کا نقشہ یکسر تبدیل ہو گیا ہے ، سیاسی منظرنامے میں آنے والی اس بڑی تبدیلی کے ساتھ ہی عالمی منڈیوں میں زبردست رجحان دیکھا جا رہا ہے، جبکہ بٹ کوائن اور سونے کے ریٹس میں بھی  اضافہ ریکارڈ کیا گیا ہے۔

کرپٹو منڈی میں تاریخی تیزی

میڈیا رپورٹ کے مطابق انتخابی نتائج کے سامنے آنے کے ساتھ ہی عالمی مارکیٹ میں بٹ کوائن کی قیمت 3 فیصد سے زائد چھلانگ لگا گئی ،  محض کچھ ہی گھنٹوں کے دوران اس میں 2,700 ڈالر کا نمایاں اضافہ دیکھنے میں آیا، جس کے بعد بٹ کوائن کی فی رقم 80,400 ڈالر کی تاریخی سطح سے تجاوز کر گئی۔

 اس کے ساتھ ہی ایتھیریم کی قیمت بھی بحال ہو کر 2,300 ڈالر کی حد عبور کرتی ہوئی 2,301 ڈالر تک جا پہنچی۔

سونے اور چاندی کے ریٹس بھی ریکارڈ بلندی پر

سرمایہ کاروں کی جانب سے محفوظ سرمایہ کاری کے انتخاب کے باعث عالمی مارکیٹ میں سونے کی فی اونس قیمت میں 72 ڈالر کا بھاری اضافہ ہوا،  اس زبردست تیزی کے بعد سونا 4,133 ڈالر فی اونس پر جا پہنچا، جو کہ تقریباً 2 فیصد کا مجموعی اضافہ بنتا ہے۔

دوسری جانب چاندی کی قیمت میں بھی 2 فیصد سے زیادہ کا اضافہ دیکھا گیا اور اس کے ریٹس 50.79 ڈالر فی اونس ریکارڈ کیے گئے۔

امریکی اور ایشیائی اسٹاک مارکیٹس کی صورتحال

معروف مالیاتی خبر رساں ادارے ‘بلاک بیٹس’ کی جاری کردہ رپورٹ کے مطابق امریکی اسٹاک مارکیٹ کے اہم انڈیکسز کے فیوچرز میں نمایاں بہتری درج کی گئی ہے،  نیسڈیک 100 فیوچرز کا خسارہ 2.2 فیصد سے کم ہو کر صرف 0.4 فیصد رہ گیا ہے، جبکہ ایس اینڈ پی 500 اور ڈاؤ فیوچرز میں معمولی کمی دیکھی گئی۔

 یہ بھی پڑھیں :مشرقِ وسطیٰ کشیدگی،عالمی منڈی میں خام تیل کی قیمتیں آسمان پر پہنچ گئیں

ایشیا کے مالیاتی مرکزوں میں بھی منڈیوں نے شاندار واپسی کی۔ ہانگ کانگ کا ‘ہینگ سینگ ٹیک انڈیکس’ دوپہر تک مثبت زون میں داخل ہو گیا، جبکہ ‘ہینگ سینگ انڈیکس’ میں 0.81 فیصد کا اضافہ ریکارڈ ہوا،   اسی طرح جنوبی کوریا کا ‘کوسپی انڈیکس’ جو دن کے آغاز میں 4 فیصد تک گر چکا تھا، بعد میں زبردست ریکوری کرتے ہوئے مثبت زون میں بند ہوا۔

چینی مارکیٹ میں زبردست برتری

چین کے حصص بازار میں بھی الیکشن کے نتائج کا مثبت اثر صاف دکھائی دیا جہاں  ‘سائنس اینڈ ٹیکنالوجی 50 انڈیکس’ 5 فیصد سے زائد بڑھ گیا، جبکہ ‘چی نیکسٹ انڈیکس’ میں 4 فیصد سے زیادہ کا استحکام دیکھا گیا جہاں  سب سے حیران کن پیش رفت سیمی کنڈکٹر شعبے سے جڑے فنڈز میں سامنے آئی، جن کی قیمتوں میں 10 فیصد سے زیادہ کا یکمشت اضافہ ریکارڈ کیا گیا۔