پی آئی اے اور اتحاد ایئرویزکا معاہدہ،31 اکتوبر سے نئی سہولیات کا آغاز

قومی فضائی کمپنی پاکستان انٹرنیشنل ایئرلائن پی آئی اےنے اپنی بین الاقوامی پروازوں کے دائرہ کار کو بڑھانے کا فیصلہ کرتے ہوئے متحدہ عرب امارات کی نجی ایئرلائن اتحاد ایئرویز کے ساتھ کوڈ شیئر، کارگو اور فریکوئنٹ فلائر پروگرام کا نیا معاہدہ طے کرلیا ہے۔

یہ شراکت داری 31 اکتوبر سے نافذ ہوگی اور اسے پی آئی اے کے لیے ایک اہم پیش رفت قرار دیا جارہا ہے پی آئی اے کے ترجمان کے مطابق یہ معاہدہ صرف مسافروں ہی نہیں بلکہ کارگو سروسز پر بھی لاگو ہوگا۔

اس کے تحت پی آئی اے کے صارفین اتحاد ایئرویز کے نیٹ ورک پر فریکوئنٹ فلائر پروگرام کے فوائد سے بھی استفادہ کرسکیں گے۔

یہ خبربھی پڑھیں :برطانیہ کے لیے پی آئی اے کے فلائٹ آپریشنز کی بحالی — لندن میں شاندار تقریب کا انعقاد

ترجمان نے مزید بتایا کہ یہ شراکت ان راستوں پر خاص طور پر مؤثر ثابت ہوگی جہاں پی آئی اے کی براہِ راست پروازیں موجود نہیں۔

اتحاد ایئرویز کے وسیع بین الاقوامی نیٹ ورک کی بدولت مسافروں کو زیادہ جامع اور آسان سفری سہولیات فراہم کی جا سکیں گی۔

ترجمان کے بقول اس اقدام سے نہ صرف پی آئی اے کے آپریشنز میں وسعت آئے گی بلکہ قومی ایئرلائن کی آمدنی میں خاطر خواہ اضافہ بھی متوقع ہے۔