’’میرا کرکٹ کیریئر کس نے تباہ کیا‘‘؟ سابق بلے باز عمر اکمل بول پڑے

قومی کرکٹر عمر اکمل نے سابق ہیڈ کوچ وقار یونس پر سنگین الزامات عائد کرتے ہوئے کہا ہے کہ وقار یونس نے ان کا کرکٹ کیریئر جان بوجھ کر تباہ کیا۔ ان کے مطابق، وقار یونس کو یہ برداشت نہیں تھا کہ ’کل کا بچہ نئی گاڑی لے کر آ رہا ہے۔‘

عمر اکمل نے ایک نجی ٹی وی انٹرویو میں کہا کہ ’اللہ نے مجھے دیا ہے تو میں اپنے اور اپنے گھر والوں کے شوق پورے کرتا ہوں، اس میں کوئی برائی نہیں۔ یہ صرف میری بات نہیں، میرے ساتھ جتنے کرکٹرز کھیلے، مثلاً رانا نوید الحسن، وہ بھی یہی کہیں گے کہ وقار یونس نے کئی کھلاڑیوں کے ساتھ ناانصافی کی۔‘

یہ بھی پڑھیں:عمر اکمل کے لیے نیشنل کرکٹ اکیڈمی کے دروازے کھل گئے

سابق مڈل آرڈر بیٹر نے مزید کہا کہ وقار یونس نے انہیں کارکردگی کی بنیاد پر ٹیم سے باہر نہیں کیا بلکہ ذاتی ناپسندیدگی کی وجہ سے ان کے خلاف کارروائی کی۔

’میں جب بھی کوئی نئی گاڑی لیتا یا اچھے کپڑے پہنتا، تو وہ طنز کرتے کہ تیرے پاس اتنے پیسے کہاں سے آگئے۔ انہیں میری ترقی اور شہرت برداشت نہیں تھی۔‘

عمر اکمل نے بتایا کہ 2016 کے ورلڈ کپ کے دوران وقار یونس نے پی سی بی کو ان کے خلاف خط اور فائلیں بھیجیں تاکہ انہیں ٹیم سے نکالا جا سکے۔

’بطور سینیئر کھلاڑی میں ان کی عزت کرتا ہوں، مگر بطور کوچ ان کی عزت نہیں کروں گا کیونکہ انہوں نے میری محنت اور جذبے کی کوئی قدر نہیں کی۔‘

مزید پڑھیں:شاہد آفریدی اور یونس خان روزہ نہیں چھوڑنے دیتے تھے، عمر اکمل

انہوں نے مزید کہا کہ انہیں دنیا بھر کی ٹی20 لیگز سے متعدد آفرز ملیں لیکن انہوں نے پاکستان کرکٹ کو ترجیح دی۔ ’میں نے پاکستان کے لیے کئی مواقع چھوڑے ہیں، کیونکہ میری پہلی ترجیح ہمیشہ اپنے ملک کے لیے کھیلنا رہی ہے۔ آج بھی اگر موقع ملا تو قومی ٹیم کی نمائندگی کے لیے تیار ہوں۔‘

کرکٹ ماہرین کے مطابق عمر اکمل کے یہ بیانات ایک بار پھر پاکستان کرکٹ میں کھلاڑیوں اور کوچز کے درمیان تنازعات کو اجاگر کر رہے ہیں۔ یاد رہے کہ عمر اکمل گزشتہ کئی سالوں سے قومی ٹیم سے باہر ہیں، تاہم وہ ڈومیسٹک اور فرنچائز کرکٹ میں اپنی فارم بحال کرنے کی کوششوں میں مصروف ہیں۔