لاہور میں بسنت کی تقریبات کے حوالے سے ضلعی انتظامیہ کی جانب سے ایک اہم پیشرفت سامنے آئی ہے، جس کے تحت بسنت کے موقع پر اڑائی جانے والی پتنگوں کے سائز اور دیگر ضروری قواعد و ضوابط کو حتمی شکل دے دی گئی ہے۔
اس سلسلے میں بسنت کے دوران استعمال ہونے والی مقررہ سائز کی پتنگوں کی ویڈیوز بھی منظرِ عام پر آ گئی ہیں، جس سے شہریوں کو ان ضوابط سے آگاہی حاصل ہو رہی ہے۔
ضلعی انتظامیہ لاہور کے مطابق بسنت کے موقع پر اڑائی جانے والی پتنگوں کے سائز کا واضح تعین کر دیا گیا ہے۔ انتظامیہ کا کہنا ہے کہ بسنت کے دوران صرف 37 انچ سے 43 انچ تک کے سائز کی پتنگیں اڑانے کی اجازت ہوگی۔ اس سے بڑے سائز یا غیر منظور شدہ پتنگوں کو اڑانے کی اجازت نہیں دی جائے گی، اور خلاف ورزی کی صورت میں کارروائی عمل میں لائی جا سکتی ہے۔
انتظامیہ کی جانب سے جاری اعلامیے میں بتایا گیا ہے کہ بسنت کے موقع پر ڈیڑھ تاوا گڈا اور چھوٹے سائز کی پتنگیں اڑائی جا سکیں گی، تاہم اس کے لیے شہریوں کو مخصوص اجازت نامہ حاصل کرنا لازم ہوگا۔ حکام کے مطابق اس اقدام کا مقصد پتنگ بازی کو ایک منظم اور محفوظ سرگرمی بنانا ہے تاکہ بسنت کی خوشیاں بغیر کسی ناخوشگوار واقعے کے منائی جا سکیں۔
مزید برآں ضلعی انتظامیہ نے پتنگیں اور ڈور تیار کرنے والوں کی رجسٹریشن کا فیصلہ بھی کیا ہے۔ اس اقدام کا مقصد غیر قانونی پتنگ بازی، خطرناک ڈور اور اس سے جڑے حادثات کی روک تھام کرنا ہے۔ انتظامیہ کے مطابق رجسٹرڈ پتنگوں پر مخصوص بار کوڈ چسپاں کیا جائے گا، جس کے ذریعے پتنگوں کی قانونی حیثیت کی تصدیق ممکن ہو سکے گی اور غیر قانونی سرگرمیوں کی نشاندہی میں مدد ملے گی۔
ڈپٹی کمشنر لاہور کی جانب سے ڈیڑھ تاوا گڈا اور چھوٹے سائز کی پتنگیں بنانے کی اجازت دے دی گئی ہے۔ ان پتنگوں کی ویڈیوز بھی سامنے آ چکی ہیں، جس کے بعد بسنت منانے کے شوقین افراد میں خاصا جوش و خروش دیکھنے میں آ رہا ہے۔
انتظامیہ کا کہنا ہے کہ ان تمام اقدامات کا مقصد بسنت کے دوران پیش آنے والے ممکنہ حادثات میں کمی لانا اور شہریوں کو ایک محفوظ ماحول فراہم کرنا ہے۔ ضلعی انتظامیہ کے مطابق مقررہ قواعد و ضوابط پر عملدرآمد سے بسنت کی روایت کو بہتر انداز میں منایا جا سکے گا اور عوام بلا خوف و خطر پتنگ بازی سے لطف اندوز ہو سکیں گے۔
By 
