سونے کی قیمتوں میں ہزاروں روپے کمی، چاندی بھی سستی ہوگئی

ایک دن کی تیزی کے بعد ملک بھر میں سونے اور چاندی کی قیمتوں میں دوبارہ مندی دیکھنے میں آ رہی ہے۔ آل پاکستان صرافہ جیمز اینڈ جیولرز ایسوسی ایشن کے مطابق عالمی اور مقامی گولڈ مارکیٹس میں قیمتی دھاتوں کی قیمتوں میں نمایاں کمی ریکارڈ کی گئی ہے، جس کے باعث خریداروں اور سرمایہ کاروں میں محتاط رجحان دیکھنے میں آ رہا ہے۔

یہ بھی پڑھیں:عالمی اور مقامی مارکیٹ میں سونا آج بھی سستا ، چاندی کی اونچی اُڑان

ایسوسی ایشن کے مطابق 24 قیراط فی تولہ سونے کی قیمت میں 4,700 روپے کی کمی ہوئی ہے، جس کے بعد فی تولہ سونا 4,55,562 روپے پر آ گیا ہے۔ اسی طرح 10گرام سونے کی قیمت میں 4,030 روپے کمی کے بعد نئی قیمت 3,90,570 روپے مقرر کی گئی ہے۔

چاندی کی قیمت میں بھی کمی ریکارڈ کی گئی ہے، آل پاکستان صرافہ جیمز اینڈ جیولرز ایسوسی ایشن کے مطابق چاندی کی فی تولہ قیمت 106 روپے کم ہو کر 7,756 روپے پر آ گئی ہے، جس سے چاندی کی مارکیٹ میں بھی مندی کا اثر نمایاں ہو گیا ہے۔

مزید پڑھیں:سونے کے بعد چاندی کی قیمت کو بھی پر لگ گئے ،قیمت بلند ترین سطح پر پہنچ گئی

دوسری جانب عالمی منڈی میں بھی سونے کی قیمت دباؤ کا شکار رہی، جہاں فی اونس سونا 47 ڈالر سستا ہو کر 4,332 ڈالر پر آ گیا ہے۔ ماہرین کے مطابق عالمی سطح پر معاشی غیر یقینی صورتحال، ڈالر کی قدر میں اتار چڑھاؤ اور سرمایہ کاروں کے محتاط رویے کے باعث قیمتی دھاتوں کی قیمتوں میں یہ کمی دیکھی جا رہی ہے۔

صرافہ مارکیٹ کے ماہرین کا کہنا ہے کہ اگر عالمی منڈی میں سونے کی قیمتوں میں استحکام نہ آیا تو مقامی مارکیٹ میں بھی قیمتوں میں مزید رد و بدل کا امکان موجود ہے، تاہم خریداروں کی نظریں آئندہ دنوں کے رجحانات پر مرکوز ہیں۔