پاکستان کا یمن کی جانب سے ریاض میں جامع مذاکرات کے انعقاد کی اپیل کا خیرمقدم

پاکستان نے یمن کے اتحاد اور علاقائی سالمیت کے لیے اپنی بھرپور حمایت کا اعادہ کیا ہے۔ ترجمان کے مطابق پاکستان نے یمن کی صدارتی قیادت کونسل کی جانب سے ریاض میں جامع مذاکرات کے انعقاد کی اپیل کا خیرمقدم کیا ہے۔

پاکستان نے ایک بار پھر تمام یمنی فریقین پر زور دیا ہے کہ وہ طے شدہ اصولوں کی بنیاد پر مذاکرات کے ذریعے سیاسی حل کے حصول کے لیے نیک نیتی کے ساتھ بات چیت میں حصہ لیں۔ بیان میں کہا گیا ہے کہ پاکستان یمن کے بحران کے پائیدار اور مذاکراتی سیاسی حل کی حمایت کرتا ہے۔

پاکستان نے واضح کیا کہ وہ یمن کی وحدت اور اس کی علاقائی سالمیت کے لیے اپنی غیر متزلزل حمایت جاری رکھے گا۔ بیان کے مطابق پاکستان اتحاد اور بھائی چارے کے اصولوں کی روشنی میں اس امید کا اظہار کرتا ہے کہ علاقائی سطح پر کی جانے والی کوششیں یمن میں دیرپا امن اور استحکام کے قیام میں معاون ثابت ہوں گی۔

پاکستان کا کہنا ہے کہ یمن میں امن و استحکام نہ صرف وہاں کے عوام بلکہ پورے خطے کے مفاد میں ہے، اور اس مقصد کے لیے تمام متعلقہ فریقین کا تعمیری کردار نہایت اہم ہے۔

یہ بھی پڑھیں: پاک سعودی وزرائے خارجہ کا ٹیلیفونک رابطہ، خطے میں کشیدگی سفارتکاری کے ذریعے حل کرنے پر اتفاق

دوسری جانب نائب وزیرِ اعظم اور وزیرِ خارجہ سینیٹر محمد اسحاق ڈار نے بیجنگ پہنچنے پر سعودی عرب کے وزیرِ خارجہ سے ٹیلیفونک گفتگو کی۔ گفتگو کے دوران دونوں رہنماؤں نے خطے میں حالیہ صورتحال پر تفصیلی تبادلۂ خیال کیا۔

نائب وزیرِ اعظم اور وزیرِ خارجہ نے یمن سے متعلق سعودی وزارتِ خارجہ کے بیان کا خیرمقدم کیا اور علاقائی صورتحال کے پُرامن حل کے لیے تمام فریقین کی کوششوں کو سراہا۔

گفتگو میں خطے میں امن و استحکام کے لیے سفارتی اور سیاسی کاوشوں کی اہمیت پر بھی زور دیا گیا، جبکہ موجودہ حالات کو بات چیت اور تعاون کے ذریعے حل کرنے کی ضرورت پر اتفاق کیا گیا۔