سونے کی قیمت میں نمایاں کمی،خریداروں کیلئے بڑی خوشخبری،نئی قیمت کیا ہوگی؟

سونے کے خریداروں کے لیے ایک اچھی خبر سامنے آ گئی ہے۔ گزشتہ کئی دنوں سے سونے کی قیمت میں مسلسل اضافے کے بعد اچانک سونے کے نرخوں میں نمایاں کمی دیکھنے میں آئی ہے، جس سے مارکیٹ میں ریلیف کی فضا پیدا ہو گئی ہے۔

ایک روز قبل سونے کی قیمت میں 10 ہزار 900 روپے کا بڑا اضافہ ریکارڈ کیا گیا تھا، جس کے بعد سونے کی قیمت بلند ترین سطح پر پہنچ گئی تھی۔ تاہم آج صرافہ بازار میں سونے کی قیمت میں فی تولہ 1500 روپے کی کمی ہوئی ہے، جس کے بعد نئی قیمت 5 لاکھ 30 ہزار 562 روپے مقرر کی گئی ہے۔

دس گرام سونا 1286 روپے سستا ہو گیا ہے، جس کے بعد اس کی نئی قیمت 4 لاکھ 54 ہزار 871 روپے ہو گئی ہے۔

یہ بھی پڑھیں:سونے کی قیمت آسمان پر، عالمی مارکیٹ میں نئی تاریخ رقم

ماہرین کے مطابق عالمی مارکیٹ میں سونے کی قیمتوں میں اتار چڑھاؤ اور مقامی سطح پر طلب میں کمی اہم وجوہات ہیں۔ تاجروں کا کہنا ہے کہ اگر عالمی مارکیٹ میں قیمتوں کا یہی رجحان برقرار رہا تو آئندہ دنوں میں سونے کے نرخوں میں مزید استحکام یا کمی کا امکان بھی موجود ہے۔

صرافہ بازار سے وابستہ حلقوں کے مطابق قیمتوں میں کمی سے نہ صرف زیورات خریدنے والے صارفین کو ریلیف ملے گا بلکہ شادی بیاہ کے سیزن کے پیشِ نظر سونے کی مانگ میں اضافے کی توقع بھی کی جا رہی ہے۔ خریداروں نے قیمتوں میں کمی کو خوش آئند قرار دیا ہے۔

واضح رہے کہ حالیہ دنوں میں سونے کی قیمتوں میں غیر معمولی اضافے نے عوام کو تشویش میں مبتلا کر رکھا تھا، تاہم آج ہونے والی کمی کے بعد مارکیٹ میں کسی حد تک اطمینان کی فضا قائم ہو گئی ہے۔