فیلڈ مارشل سید عاصم منیر نے کہا ہے کہ پاکستان کی مسلح افواج اور پیپلز لبریشن آرمی حقیقی شراکت دار ہیں، جن کا تعلق باہمی اعتماد اور غیر متزلزل تعاون پر قائم ہے۔ انہوں نے کہا کہ دونوں ممالک کی آزمودہ دوستی بدلتے ہوئے علاقائی اور عالمی حالات کے باوجود پہلے سے زیادہ مضبوط ہے۔
پاکستان کی مسلح افواج کے چیف آف ڈیفنس فورسز، فیلڈ مارشل سید عاصم منیر نے کہا ہے کہ پاکستان کی مسلح افواج اور چین کی پیپلز لبریشن آرمی حقیقی شراکت دار ہیں، جو خطے میں امن، استحکام اور مشترکہ سٹریٹجک مفادات کے تحفظ کے لیے قریبی تعاون جاری رکھے ہوئے ہیں۔
پاک فوج کے شعبہ تعلقات عامہ ’آئی ایس پی آر‘ کے مطابق عوامی جمہوریہ چین کی پیپلز لبریشن آرمی کے قیام کی 99ویں سالگرہ کے موقع پر جنرل ہیڈکوارٹرز راولپنڈی میں ایک پروقار تقریب کا انعقاد کیا گیا۔
تقریب میں پاکستان میں چین کے سفیر جیانگ زائی ڈونگ نے بطور مہمان خصوصی شرکت کی، جبکہ چین کے دفاعی اتاشی میجر جنرل وانگ ژونگ، چینی سفارت خانے کے اعلیٰ حکام اور پاکستان کی تینوں مسلح افواج کے سینئر افسران بھی موجود تھے۔
پیپلز لبریشن آرمی کو مبارکباد
تقریب سے خطاب کرتے ہوئے فیلڈ مارشل سید عاصم منیر نے چینی فوج کو اس کے قیام کی 99ویں سالگرہ پر مبارکباد پیش کی اور چین کے دفاع، قومی ترقی اور عالمی امن و سلامتی کے فروغ میں پیپلز لبریشن آرمی کی خدمات کو سراہا۔
انہوں نے کہا کہ چین کی مسلح افواج نے ملکی دفاع کے ساتھ ساتھ علاقائی استحکام اور عالمی امن کے فروغ میں بھی اہم کردار ادا کیا ہے۔
پاک چین دوستی وقت کی ہر آزمائش پر پوری اتری
فیلڈ مارشل سید عاصم منیر نے کہا کہ پاکستان اور چین کے تعلقات منفرد، آزمودہ اور وقت کی ہر کسوٹی پر پورا اترنے والے ہیں۔
ان کے مطابق دونوں ممالک کی دوستی بدلتے ہوئے علاقائی اور عالمی حالات کے باوجود مسلسل مضبوط ہوئی ہے اور اس کی بنیاد باہمی اعتماد، احترام اور مشترکہ مفادات پر قائم ہے۔
انہوں نے کہا کہ پاکستان کی مسلح افواج اور پیپلز لبریشن آرمی کے درمیان تعلقات صرف عسکری تعاون تک محدود نہیں بلکہ دونوں افواج خطے میں امن، استحکام اور مشترکہ سٹریٹجک اہداف کے حصول کے لیے ایک دوسرے کی حقیقی شراکت دار ہیں۔
چینی سفیر کا پاکستان کی قربانیوں کو خراج تحسین
تقریب سے خطاب کرتے ہوئے چین کے سفیر جیانگ زائی ڈونگ نے یادگاری تقریب کے انعقاد پر فیلڈ مارشل سید عاصم منیر کا شکریہ ادا کیا۔
انہوں نے دہشتگردی کے خلاف جنگ میں پاکستان کی مسلح افواج کی قربانیوں اور پیشہ ورانہ کردار کو سراہتے ہوئے کہا کہ چین پاکستان کے ساتھ اپنی ہر موسم کی سٹریٹجک تعاون پر مبنی شراکت داری کو مزید مضبوط بنانے کے لیے پُرعزم ہے۔
چینی سفیر نے پاکستان کے لیے چین کی غیر متزلزل حمایت کا اعادہ کرتے ہوئے دونوں ممالک کے درمیان دفاعی، سفارتی اور سٹریٹجک تعاون کو مزید فروغ دینے کے عزم کا اظہار بھی کیا۔
پاک چین دفاعی تعاون کی اہمیت
پاکستان اور چین کے درمیان دفاعی تعاون گزشتہ کئی دہائیوں سے مسلسل مضبوط ہوتا رہا ہے۔ دونوں ممالک مشترکہ فوجی مشقوں، دفاعی پیداوار، عسکری تربیت، انٹیلی جنس تعاون اور جدید دفاعی ٹیکنالوجی کے شعبوں میں قریبی اشتراک رکھتے ہیں۔
دونوں ممالک کے درمیان دفاعی تعاون کو خطے میں امن و استحکام اور مشترکہ سلامتی کے لیے اہم قرار دیا جاتا ہے۔
پاکستان اور چین کو اکثر ’آہنی بھائی‘ قرار دیا جاتا ہے، جبکہ دونوں ممالک کے تعلقات سفارتی، اقتصادی، دفاعی اور تزویراتی شعبوں میں مسلسل وسعت اختیار کرتے رہے ہیں۔
دفاعی میدان میں مشترکہ منصوبوں، جدید عسکری آلات، مشترکہ مشقوں اور اعلیٰ سطح کے فوجی روابط نے دونوں ممالک کی شراکت داری کو مزید مضبوط کیا ہے۔
چین پاکستان کا اہم دفاعی شراکت دار بھی ہے اور دونوں ممالک علاقائی سلامتی سمیت مختلف بین الاقوامی امور پر قریبی رابطہ رکھتے ہیں۔
فیلڈ مارشل سید عاصم منیر کا بیان ایسے وقت میں سامنے آیا ہے جب خطے میں سیکیورٹی ، جغرافیائی سیاست اور عالمی طاقتوں کے درمیان مسابقت میں مسلسل اضافہ دیکھا جا رہا ہے۔
پاکستان کی جانب سے چین کے ساتھ دفاعی شراکت داری کو ‘حقیقی شراکت داری’ قرار دینا اس بات کا اشارہ ہے کہ دونوں ممالک مستقبل میں بھی دفاع، انسداد دہشتگردی، مشترکہ مشقوں اور اسٹریٹجک تعاون کو مزید وسعت دینے کا ارادہ رکھتے ہیں۔
چینی سفیر کی جانب سے دہشت گردی کے خلاف پاکستان کی قربانیوں کا اعتراف اور غیر متزلزل حمایت کا اعادہ بھی اس بات کی عکاسی کرتا ہے کہ دونوں ممالک باہمی اعتماد پر مبنی تعلقات کو مزید مضبوط بنانے کے خواہاں ہیں۔
موجودہ علاقائی صورتحال میں پاکستان اور چین کا دفاعی تعاون نہ صرف دوطرفہ تعلقات بلکہ خطے میں سلامتی، اقتصادی روابط اور سٹریٹجک توازن کے تناظر میں بھی اہمیت رکھتا ہے۔
By 
