میٹرک امتحان کا شیڈول جاری،بورڈز نے ڈیٹ شیٹ جاری کر دی،کون سا پیپر کب ہوگا جانیے

پنجاب بورڈ کمیٹی آف چیئرمینز کے تحت کام کرنے والے پنجاب بھر کے تعلیمی بورڈز نے جماعت دہم کے سالانہ امتحانات 2026 کی باقاعدہ ڈیٹ شیٹ جاری کر دی ہے، جس کے مطابق امتحانات 27 مارچ 2026 سے شروع ہو کر 16 اپریل 2026 تک جاری رہیں گے۔ یہ شیڈول صوبے کے تمام بورڈز میں یکساں طور پر نافذ العمل ہوگا۔

جاری کردہ شیڈول کے مطابق صبح کے امتحانات کا آغاز 9 بجے ہوگا جبکہ شام کے پرچے دوپہر 2 بجے شروع ہوں گے۔ جمعہ کے روز شام کے امتحانات ڈھائی بجے شروع کیے جائیں گے۔ حکام نے طلبہ کو ہدایت کی ہے کہ وہ امتحانی مراکز پر وقت سے پہلے پہنچیں اور رول نمبر سلپ سمیت تمام ضروری دستاویزات ہمراہ لائیں۔

یہ بھی پڑھیں:لڑکیوں کے تعلیمی اداروں کے متعلق حکومت نے نئے احکامات جاری کر دیے

بورڈ حکام کے مطابق تحریری امتحانات کے بعد عملی امتحانات کا الگ شیڈول جاری کیا گیا ہے، جن کی تفصیلات متعلقہ اسکولز اور امتحانی مراکز طلبہ کو فراہم کریں گے۔

حکام نے امیدواروں کو ہدایت کی ہے کہ وہ امتحانی ضابطہ اخلاق پر سختی سے عمل کریں، ممنوعہ اشیاء ہمراہ نہ لائیں اور وقت کی پابندی کو یقینی بنائیں۔ حکام کا کہنا ہے کہ تاخیر سے آنے والے طلبہ کو امتحان میں شرکت کی اجازت نہ دینے کا اختیار سپرنٹنڈنٹ کے پاس ہوگا۔

واضح رہے کہ جماعت دہم کے امتحانات طلبہ کے تعلیمی کیریئر میں اہم سنگ میل سمجھے جاتے ہیں کیونکہ انہی نتائج کی بنیاد پر ان کی اعلیٰ ثانوی تعلیم میں داخلے کا فیصلہ ہوتا ہے۔