آج کا موسم کیسا رہے گا ، محکمہ موسمیات نے الرٹ جاری کر دیا

اسلام آباد اور گردونواح میں آئندہ 24 گھنٹوں کے دوران موسم مجموعی طور پر گرم اور خشک رہنے کی پیشگوئی کی گئی ہے، جبکہ دن کے بعض اوقات میں جزوی ابر آلود رہے گا ۔ محکمہ موسمیات کے مطابق خطے میں فی الحال کسی بڑے موسمی نظام کے اثرات موجود نہیں ہیں جس کے باعث بارش کا امکان نہ ہونے کے برابر ہے۔

دن کے وقت درجہ حرارت میں اضافہ ہوگا اور گرمی کی شدت معمول سے زیادہ رہے گی ۔ زیادہ سے زیادہ درجہ حرارت تقریباً 36 ڈگری سینٹی گریڈ تک پہنچنے کا امکان ہے، جبکہ رات کے اوقات میں موسم نسبتاً بہتر اور قدرے ٹھنڈا رہے گا اور درجہ حرارت 23 سے 24 ڈگری سینٹی گریڈ کے درمیان رہنے کی توقع ہے۔

 یہ بھی پڑھیں :گرمی یا بارشیں ؟ محکمہ موسمیات کی پیشگوئی آگئی

فضا میں نمی کا تناسب کم رہنے کے باعث موسم خشک رہے گا جس سے گرد و غبار اور ہلکی دھند جیسی کیفیت بھی بعض علاقوں میں پیدا ہو سکتی ہے۔

محکمہ موسمیات نے شہری علاقوں میں دن کے اوقات میں دھوپ کی شدت زیادہ ہونے کے باعث شہریوں کو احتیاط برتنے کی ہدایت کی ہے، خاص طور پر بزرگ افراد اور بچوں کو غیر ضروری طور پر دھوپ میں نکلنے سے گریز کرنے کا مشورہ دیا گیا ہے۔

محکمہ موسمیات کے مطابق آئندہ 24 گھنٹوں کے دوران کسی بڑے بارش کے سسٹم کے داخل ہونے کے امکانات نہیں ہیں، تاہم بالائی فضا میں جزوی بادل چھائے رہیں گے ۔