پاسپورٹ گم ہونے کی صورت میں ایمر جنسی سفری دستاویزات کیسے حاصل کی جائیں ؟نئی شرائط جاری

بیورو آف امیگریشن نے پاسپورٹ گم ہونے کی صورت میں ایمرجنسی سفری دستاویز یعنی ای ٹی ڈی کے اجرا سے متعلق نئی شرائط اور ضابطہ کار جاری کردیا ہے، جس کے تحت شناخت اور سفری ریکارڈ کی مکمل تصدیق لازمی قرار دی گئی ہے۔

حکام کے مطابق بیرون ملک سفر کرنے والے پاکستانی شہریوں کیلئے ای ٹی ڈی کے اجرا کے عمل کو مزید سخت اور شفاف بنایا گیا ہے تاکہ جعلی دستاویزات اور غیر قانونی سفر کی روک تھام یقینی بنائی جا سکے۔ جاری کردہ اعلامیے میں کہا گیا ہے کہ درخواست گزار کی قومی شناخت، پاسپورٹ اور امیگریشن ریکارڈ کی مکمل جانچ پڑتال کے بعد ہی ای ٹی ڈی جاری کیا جائے گا۔

 یہ بھی پڑھیں :پاکستانی پاسپورٹ پر کتنے ممالک کا ویزا فری سفر کیا جاسکتا،نئی رینکنگ جاری

بیورو آف امیگریشن کے مطابق نادرا سے قومی شناختی کارڈ کی تصدیق لازمی ہوگی جبکہ امپاس سسٹم کے ذریعے مشین ریڈ ایبل یا مینوئل پاسپورٹ کی توثیق بھی ضروری قرار دی گئی ہے۔ حکام کا کہنا ہے کہ اگر شناختی دستاویزات یا دیگر ریکارڈ میں کسی قسم کا تضاد پایا گیا تو معاملہ وزارت داخلہ کو بھیجا جائے گا جہاں درخواست گزار کی قومی حیثیت کی مزید تصدیق کی جائے گی۔

اعلامیے کے مطابق ای ٹی ڈی صرف انہی افراد کو جاری کیا جائے گا جن کے شناختی کارڈ اور پاسپورٹ کی تصدیق مکمل ہوچکی ہو تاہم اگر شناختی کارڈ کی تصدیق ہوجائے لیکن پاسپورٹ کی توثیق نہ ہوسکے تو مخصوص شرائط کے تحت ای ٹی ڈی جاری کیا جاسکتا ہے جبکہ دونوں دستاویزات کی تصدیق نہ ہونے کی صورت میں درخواست مسترد کردی جائے گی۔

  یہ بھی پڑھیں :پاسپورٹ کے حصول کے عمل کو مزید آسان بنانے کے لیے شہریوں کو بڑی سہولت فراہم کرنے کا فیصلہ

حکام نے واضح کیا ہے کہ اگر کسی شہری کے پاس شناختی کارڈ یا پاسپورٹ دستیاب نہ ہو تب بھی وزارت داخلہ سے تصدیق کے بعد کارروائی آگے بڑھائی جاسکے گی۔

مزید برآں امپاس، ایف آئی اے کے سفری ریکارڈ کے ذریعے بھی معلومات کی تصدیق کرے گا جبکہ مینوئل پاسپورٹ رکھنے والے افراد کے لیے متعلقہ پاسپورٹ جاری کرنے والے دفتر سے رابطہ کیا جائے گا۔

اعلامیے میں کہا گیا ہے کہ اگر کوئی گمشدہ پاسپورٹ امپاس دفتر میں ضبط شدہ حالت میں موجود پایا گیا تو متعلقہ امیگریشن پورٹ پر ایف آئی اے حکام کو فوری آگاہ کیا جائے گا۔ اس کے علاوہ ای ٹی ڈی کے اجرا سے متعلق وزارت داخلہ اور امپاس کو 24 گھنٹے کے اندر مطلع کرنا بھی لازمی قرار دیا گیا ہے۔