بارشیں اور ژالہ باری ، این ڈی ایم اے نے خبردار کردیا

ملک کے مختلف حصوں میں موسم ایک بار پھر خطرناک رخ اختیار کرنے جا رہا ہے جہاں نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 12 سے 24 گھنٹوں کے دوران شدید بارشوں، گرج چمک اور ژالہ باری کے خدشے کے پیش نظر ہائی الرٹ جاری کر دیا ہے۔

ماہرین کے مطابق بعض علاقوں میں موسلا دھار بارش معمولاتِ زندگی کو متاثر کر سکتی ہے جبکہ پہاڑی علاقوں میں لینڈ سلائیڈنگ کا خطرہ بھی بڑھ گیا ہے۔

کن علاقوں میں شدید بارشوں کا امکان ہے؟

این ڈی ایم اے کے مطابق اسلام آباد سمیت پنجاب، خیبر پختونخوا، گلگت بلتستان اور آزاد کشمیر کے مختلف علاقوں میں تیز ہواؤں کے ساتھ بارش اور گرج چمک کی پیشگوئی کی گئی ہے۔

پنجاب کے شہروں راولپنڈی، مری، اٹک، چکوال، جہلم، گجرات، منڈی بہاؤالدین، میانوالی، ڈی جی خان، قصور، اوکاڑہ، گوجرانوالہ اور حافظ آباد میں آندھی اور بارش متوقع ہے۔

اس کے علاوہ لاہور، فیصل آباد، سرگودھا، جھنگ، ساہیوال، ملتان، بہاولپور اور رحیم یار خان میں بھی موسلا دھار بارش ہونے کا امکان ظاہر کیا گیا ہے۔

خیبر پختونخوا کے چترال، دیر، سوات، مالاکنڈ، پشاور، مردان، نوشہرہ، ایبٹ آباد، مانسہرہ، کوہاٹ اور ڈیرہ اسماعیل خان سمیت متعدد اضلاع میں شدید بارشوں کی پیشگوئی کی گئی ہے۔

دوسری جانب گلگت بلتستان کے اسکردو، ہنزہ، نگر، استور، شگر اور دیامر جبکہ آزاد کشمیر کے مظفرآباد، نیلم ویلی، باغ، کوٹلی، پونچھ اور بھمبر میں بھی خراب موسم اور تیز بارشوں کا امکان موجود ہے۔

ژالہ باری، فصلوں اور بجلی کے نظام کو نقصان پہنچنے کا خدشہ

این ڈی ایم اے نے خبردار کیا ہے کہ بعض علاقوں میں شدید ژالہ باری بھی ہو سکتی ہے،  اس صورتحال کے باعث کمزور عمارتوں، کھڑی فصلوں اور بجلی کی تنصیبات کو نقصان پہنچنے کا خطرہ موجود ہے۔

یہ بھی پڑھیں :گرمی یا بارشیں ؟ محکمہ موسمیات کی پیشگوئی آگئی

ماہرین کا کہنا ہے کہ تیز ہواؤں اور ژالہ باری سے زرعی شعبہ متاثر ہو سکتا ہے جبکہ شہری علاقوں میں بجلی کی فراہمی میں بھی خلل آ سکتا ہے۔

لینڈ سلائیڈنگ اور اہم شاہراہوں کی بندش کا خطرہ

این ڈی ایم اے  کے مطابق شمالی علاقوں میں لینڈ سلائیڈنگ اور گلیشیائی جھیلوں کے پھٹنے کے خطرات میں اضافہ ہو گیا ہے،  اس کے نتیجے میں کئی اہم رابطہ سڑکیں متاثر ہو سکتی ہیں۔

خصوصاً قراقرم ہائی وے، ناران روڈ اور اسکردو جانے والے راستوں پر سفر کرنے والے افراد کو محتاط رہنے کی ہدایت کی گئی ہے، کیونکہ شدید بارشوں کے باعث ان شاہراہوں پر ٹریفک متاثر ہونے کا خدشہ ہے۔

عوام کے لیے اہم ہدایات جاری

این ڈی ایم اے نے تمام ضلعی انتظامیہ، ریسکیو اداروں اور متعلقہ محکموں کو ہنگامی صورتحال سے نمٹنے کے لیے مکمل طور پر الرٹ رہنے کی ہدایت جاری کر دی ہے۔

عوام کو بھی مشورہ دیا گیا ہے کہ خراب موسم کے دوران غیر ضروری سفر سے گریز کریں، موسمی صورتحال پر نظر رکھیں اور کسی بھی ہنگامی صورتحال میں مقامی انتظامیہ کی ہدایات پر عمل کریں۔