فیلڈ مارشل سید عاصم منیر سے بحرین نیشنل گارڈ کے کمانڈر کی ملاقات، علاقائی صورتحال اور باہمی فوجی تعاون پر تبادلہ خیال

 آئی ایس پی آر کے مطابق فیلڈ مارشل سید عاصم منیر سے بحرین نیشنل گارڈ کے کمانڈر نے ملاقات کی، جس میں دونوں ممالک کے درمیان دفاعی تعاون، علاقائی صورتحال اور باہمی دلچسپی کے امور پر تفصیلی تبادلہ خیال کیا گیا۔

ملاقات کے دوران خطے کی موجودہ سکیورٹی صورتحال اور اس سے جڑے چیلنجز پر بھی گفتگو ہوئی، جبکہ دونوں رہنماؤں نے خطے میں امن و استحکام کے لیے مشترکہ کوششوں کو اہم قرار دیا۔

آئی ایس پی آر کے مطابق اس موقع پر پاکستان اور بحرین کے درمیان فوجی سطح پر تعاون کے فروغ پر اتفاق کیا گیا۔ دونوں جانب سے دفاعی روابط کو مزید وسعت دینے اور مختلف شعبوں میں مشترکہ تربیت اور تعاون بڑھانے پر بھی زور دیا گیا۔

یہ بھی پڑھیں :فیلڈ مارشل سید عاصم منیر سے لبنانی عسکری سربراہ جنرل روڈولف ہائکل کی جی ایچ کیو میں اہم ملاقات

ملاقات میں اس بات پر بھی اتفاق کیا گیا کہ پاکستان اور بحرین کے درمیان موجودہ دوستانہ تعلقات کو مزید مضبوط بنایا جائے گا اور دفاعی و عسکری شعبوں میں تعاون کو نئی جہت دی جائے گی۔

دونوں فریقین نے اس عزم کا اظہار کیا کہ باہمی تعاون کے ذریعے نہ صرف دفاعی تعلقات کو مضبوط کیا جائے گا بلکہ خطے میں امن و سلامتی کے لیے بھی مشترکہ کردار ادا کیا جائے گا۔