خلیجی ملک میں ڈرائیونگ لائسنس لینے والوں کیلئے بڑا اعلان

خلیجی ملک کویت میں ڈرائیونگ ٹیسٹ دینے والے افراد کے لیے اہم سہولت کا اعلان کر دیا گیا ہے۔حکام نے واضح کیا ہے کہ شام کے اوقات میں ڈرائیونگ ٹیسٹ کی اپوائنٹمنٹ رکھنے والے امیدوار اب مقررہ دن صبح کے اوقات میں بھی ٹیسٹنگ مراکز کا رخ کر سکتے ہیں تاکہ ان کے امتحانی مراحل بغیر کسی رکاوٹ کے مکمل ہو سکیں۔

جنرل ٹریفک ڈیپارٹمنٹ کے آگاہی یونٹ کے اسسٹنٹ ڈائریکٹر لیفٹیننٹ کرنل عبداللہ بو حسن کے مطابق شام کے ڈرائیونگ ٹیسٹ کے لیے اپوائنٹمنٹ حاصل کرنے والے تمام افراد کو صبح 8 بجے سے دوپہر 2 بج کر 30 منٹ تک ٹیسٹنگ مراکز میں حاضری کی اجازت دی گئی ہے۔ اس اقدام کا مقصد امیدواروں کو زیادہ سہولت فراہم کرنا اور امتحانی عمل کو مؤثر بنانا ہے۔

 یہ بھی پڑھیں :موٹرسائیکل ڈرائیونگ لائسنس کے لیے عمر کی حد سے متعلق بڑا فیصلہ

کویت ٹی وی سے گفتگو کرتے ہوئے عبداللہ بو حسن نے بتایا کہ مختلف گورنریٹس میں ڈرائیور تربیتی شعبوں کی سرگرمیاں اس وقت صرف صبح کے اوقات تک محدود ہیں، اسی وجہ سے امیدواروں کو ہدایت کی گئی ہے کہ وہ مقررہ وقت کے اندر مراکز کا دورہ کرکے اپنا طریقہ کار مکمل کریں۔

انہوں نے مزید کہا کہ ایسے امیدوار جو کسی وجہ سے اپنی مقررہ اپوائنٹمنٹ پر حاضر نہیں ہو سکے یا ان کا وقت ضائع ہو گیا، وہ ’’سہل‘‘ ایپلی کیشن کے ذریعے اپنی ڈرائیونگ ٹیسٹ کی تاریخ دوبارہ مقرر کر سکتے ہیں۔ اس سہولت کے ذریعے امیدواروں کو نئی اپوائنٹمنٹ حاصل کرنے میں آسانی ہوگی۔

حکام کے مطابق وزارت داخلہ شام کی اپوائنٹمنٹ رکھنے والے افراد کو خصوصی اطلاعات اور الرٹس بھی ارسال کر رہی ہے تاکہ وہ نئے اوقات کار سے آگاہ رہیں اور کسی قسم کی دشواری کا سامنا نہ کریں۔

 یہ بھی پڑھیں :خوشخبری: اب ڈرائیونگ لائسنس کارڈ رکھنے کی ضرورت نہیں؟

لیفٹیننٹ کرنل عبداللہ بو حسن نے امیدواروں کو مشورہ دیا کہ امتحانی مراکز جانے سے قبل اپنی درخواستوں اور مقررہ تاریخوں کی تصدیق ضرور کریں تاکہ وقت اور محنت کے ضیاع سے بچا جا سکے۔ انہوں نے کہا کہ وزارت داخلہ کی جانب سے جاری ہدایات پر عمل درآمد امتحانی عمل کو مزید آسان اور مؤثر بنانے میں مددگار ثابت ہوگا۔