نظامِ شمسی کا سب سے بڑا آتش فشاں کہاں موجود ہے؟

مریخ پر موجود اولمپس مونس نظامِ شمسی کا سب سے بڑا اور بلند ترین آتش فشاں ہے، جس کا حجم اور بلندی اسے خلائی تحقیق کے دلچسپ ترین عجائبات میں شامل کرتے ہیں۔

سائنس دانوں کے مطابق اولمپس مونس تقریباً 22 کلومیٹر بلند ہے، جو زمین کے سب سے اونچے پہاڑ ماؤنٹ ایورسٹ سے لگ بھگ تین گنا زیادہ اونچا ہے۔ ماؤنٹ ایورسٹ کی بلندی تقریباً 8.8 کلومیٹر ہے۔

اس دیوہیکل آتش فشاں کا پھیلاؤ بھی حیران کن حد تک وسیع ہے۔ اس کی بنیاد تقریباً 600 کلومیٹر تک پھیلی ہوئی ہے، جبکہ اس کا مجموعی رقبہ امریکی ریاست ایریزونا یا یورپی ملک فرانس کے برابر بتایا جاتا ہے۔

یہ بھی پڑھیں :چند آسان احتیاطیں، آپ کے اسمارٹ فون کی عمر بڑھا سکتی ہیں

ماہرین کا کہنا ہے کہ اولمپس مونس کی ڈھلوانیں غیرمعمولی طور پر ہموار ہیں اور ان کا زاویہ صرف 2 سے 5 ڈگری کے درمیان ہے۔ یہی وجہ ہے کہ اگر کوئی شخص اس کی چوٹی پر کھڑا ہو تو اسے پہاڑ کا آغاز یا نچلا حصہ دکھائی نہیں دے گا، کیونکہ یہ مریخ کے افق کی گولائی سے بھی آگے تک پھیلا ہوا ہے۔

یہ بھی پڑھیں :مریخ پر زندگی کا نیا سراغ؟ ناسا کی اہم دریافت

سائنس دانوں کے مطابق مریخ کی کمزور کششِ ثقل اور باریک فضا نے اس آتش فشاں کو غیرمعمولی جسامت اختیار کرنے میں مدد دی، جس کے باعث یہ اربوں سال بعد بھی نظامِ شمسی کے سب سے بڑے آتش فشاں کا اعزاز اپنے نام رکھتا ہے۔

اولمپس مونس نہ صرف مریخ کی جغرافیائی تاریخ کو سمجھنے میں اہم کردار ادا کرتا ہے بلکہ یہ خلائی سائنس دانوں کے لیے تحقیق کا ایک اہم مرکز بھی ہے۔