سوزوکی فرونکس نے اپنی نئی گاڑی کی قیمت میں اچانک بڑی کمی کا اعلان کردیا

پاک سوزوکی نے اپنی نئی ہائبرڈ گاڑی ’سوزوکی فرونکس‘ کی قیمتوں میں ایک ہی دن کے اندر دوسری بار غیر متوقع تبدیلی کرتے ہوئے، پہلے سے کیے گئے بھاری اضافے پر ایک محدود مدت کی پروموشنل رعایت کا اعلان کر دیا ہے۔

منگل کو کمپنی نے اپنی سرکاری ویب سائٹ پر فرونکس کی قیمتوں میں زبردست اضافہ کیا تھا۔ پہلے اعلامیے کے مطابق فرونکس جی ایل ایکس 6 اے، ٹی مونو ٹون کی قیمت 6,299,999 روپے سے بڑھا کر 7,000,000 روپے کر دی گئی تھی، جبکہ جی ایل ایکس 6 اے، ٹی ٹو ٹون کی قیمت 6,374,999 روپے سے بڑھا کر 7,075,000 روپے تک پہنچا دی گئی تھی۔

قیمتوں کی تفصیلات ذیل میں دی گئی ہیں

قیمتوں میں اس بھاری اضافے کے محض چند گھنٹوں بعد پاک سوزوکی نے ان نئی قیمتوں پر ایک محدود مدت کی پروموشنل پیشکش متعارف کروا دی۔ اس رعایت کے بعد مونو ٹون ویرینٹ اب 6,700,000 روپے اور ٹو ٹون ویرینٹ 6,775,000 روپے میں دستیاب ہوگا۔

یہ بھی پڑھیں:سوزوکی فرونکس نے پاکستانی آٹو مارکیٹ میں دھوم مچا دی

تاہم اس بظاہر ڈسکاؤنٹ کے باوجود خریداروں کو اصل پرانی قیمتوں کے مقابلے میں اب بھی زیادہ رقم ادا کرنا پڑے گی۔

حقیقت میں، سوزوکی نے پہلے گاڑی کی قیمت میں تقریباً 700,000 روپے کا اضافہ کیا اور پھر 300,000 روپے کی رعایت کا اعلان کر کے صاف طور پر 400,001 روپے کا خالص (نیٹ) اضافہ برقرار رکھا ہے۔

 کمپنی نے اس بات کی وضاحت نہیں کی کہ یہ رعایتی پیشکش کب تک برقرار رہے گی، صرف اتنا بتایا گیا ہے کہ یہ ’محدود وقت اور محدود گاڑیوں‘ کے لیے دستیاب ہے۔

پاک سوزوکی نے حال ہی میں پاکستانی مارکیٹ میں کراس اوور ایس یو وی کاؤنٹر میں قدم رکھتے ہوئے سوزوکی فرونکس ہائبرڈ کو متعارف کرایا تھا۔

پاکستان کی آٹو انڈسٹری میں جب بھی کوئی نئی گاڑی لانچ کی جاتی ہے تو گاڑی ساز کمپنیاں عام طور پر پہلے چند سو یا چند ہزار یونٹس کے لیے ’انٹروڈکٹری پرائس‘ (ابتدائی تعارفی قیمت) فراہم کرتی ہیں اور بعد میں قیمتوں میں اضافہ کر دیا جاتا ہے۔

مزید پڑھیں:فائلر یا نان فائلر؟ سوزوکی آلٹو، کلٹس اور سوئفٹ خریدنے سے پہلے نئے ٹیکس ضرور جان لیں

پاکستان میں روپے کی قدر میں اتار چڑھاؤ، در آمدی پارٹس پر ٹیکسز اور خام مال کی لاگت میں اضافے کو کمپنیاں قیمتیں بڑھانے کی بنیادی وجہ قرار دیتی ہیں، لیکن ایک ہی دن میں قیمت بڑھا کر فوراً ڈسکاؤنٹ کی پیشکش کا طریقہ کار آٹو انڈسٹری میں کافی غیر معمولی سمجھا جاتا ہے۔

پاک سوزوکی کی جانب سے ایک ہی دن میں قیمتوں میں تبدیلی کی یہ لائحہ عمل تجارتی اور مارکیٹنگ کے نقطہ نظر سے انتہائی اہم ہے۔

مارکیٹنگ حکمتِ عملی یا اینکرنگ پرائسنگ

اتوار یا منگل کو یکلخت 700,000 روپے کا اضافہ خریداروں کے لیے شدید صدمے کا باعث بن سکتا تھا۔ کمپنی نے فوراً 300,000 روپے کی ‘رعایت’ کا اعلان کر کے ایک نفیساتی حربہ استعمال کیا ہے، تاکہ خریداروں کو 400,001 روپے کا خالص اضافہ زیادہ گراں نہ گزرے اور وہ اسے ایک ‘رعایت’ سمجھ کر جلد آرڈر بک کروا لیں۔

خریداروں پر عجلت کا دباؤ

’محدود وقت اور محدود یونٹس‘ کی شرط رکھ کر کمپنی خریداروں پر یہ دباؤ ڈالنا چاہتی ہے کہ وہ قیمت میں مزید ممکنہ اضافے (یعنی 7,000,000 روپے تک پہنچنے) سے پہلے گاڑی کی بکنگ کروا لیں۔

کمپنی کی ساکھ اور شفافیت پر سوالات

ایک ہی دن کے اندر دو مختلف نوٹیفکیشنز کا جاری ہونا پاک سوزوکی کی پرائسنگ پالیسی میں عدم استحکام اور جلد بازی کو ظاہر کرتا ہے۔ اس سے گاڑیوں کے خریداروں اور سرمایہ کاروں میں کمپنی کے اعتماد اور پالیسیوں کے حوالے سے تحفظات پیدا ہوتے ہیں۔