میرپور ڈویژن میں ا لیکشن مہم کا وقت ختم،سامان کی ترسیل آج ،پولنگ کل ہوگی

آزاد کشمیر قانون ساز اسمبلی کے پہلے مرحلے میں میرپور ڈویژن کے 3 اضلاع کے 13 حلقوں میں انتخابی مہم کا وقت رات 12 بجے ختم ہوگیا، جس کے بعد امیدواروں کو انتخابی سرگرمیاں روکنے کی ہدایت کر دی گئی ہے۔

الیکشن شیڈول کے مطابق میرپور ڈویژن کے اضلاع میرپور، کوٹلی اور بھمبر میں پولنگ 27 جولائی کو ہوگی، جبکہ پولنگ اسٹیشنوں پر انتخابی سامان کی ترسیل کا عمل اتوار سے شروع کیا جائے گا تاکہ انتخابات کے انتظامات بروقت مکمل کیے جا سکیں۔

میرپور ڈویژن کے 13 حلقوں میں مجموعی طور پر 14 لاکھ ایک ہزار 439 رجسٹرڈ ووٹرز اپنا حق رائے دہی استعمال کریں گے، جن میں 7 لاکھ 25 ہزار 118 مرد اور 6 لاکھ 75 ہزار 628 خواتین ووٹرز شامل ہیں۔

انتخابات کے لیے میرپور ڈویژن میں مجموعی طور پر 2 ہزار 454 پولنگ اسٹیشن قائم کیے گئے ہیں، ضلع میرپور کے 4 حلقوں میں 597، ضلع کوٹلی کے 6 حلقوں میں 1 ہزار 107 جبکہ ضلع بھمبر کے 3 حلقوں میں 608 پولنگ اسٹیشن قائم کیے گئے ہیں۔

یہ بھی پڑھیں :الیکشن جیتے تو آزاد کشمیر کا وزیر اعظم بننا چاہوں گا، نواز شریف

میرپور ڈویژن کے 13 حلقوں میں مسلم لیگ (ن)، پاکستان پیپلز پارٹی، استحکام پاکستان پارٹی سمیت مختلف سیاسی جماعتوں اور آزاد امیدواروں سمیت مجموعی طور پر 296 امیدوار میدان میں ہیں۔

سیاسی حلقوں کے مطابق ایل اے 3 میرپور، ایل اے 6 بھمبر اور ایل اے 10 کوٹلی میں پیپلز پارٹی، مسلم لیگ (ن) اور استحکام پاکستان پارٹی کے امیدواروں کے درمیان سخت مقابلے کی توقع کی جا رہی ہے۔

دوسری جانب متحدہ قومی موومنٹ (ایم کیو ایم) پاکستان نے آزاد کشمیر انتخابات میں مسلم لیگ (ن) کی مکمل حمایت کا اعلان کر دیا ہے۔

مسلم لیگ (ن) کا وفد پارٹی کے صوبائی صدر بشیر میمن کی قیادت میں ایم کیو ایم پاکستان کے مرکز بہادر آباد پہنچا، جہاں انہوں نے ایم کیو ایم کے سینئر رہنما ڈاکٹر فاروق ستار اور دیگر رہنماؤں سے ملاقات کی۔

ملاقات کے بعد میڈیا سے گفتگو کرتے ہوئے ڈاکٹر فاروق ستار نے اعلان کیا کہ ایم کیو ایم پاکستان آزاد کشمیر انتخابات میں مسلم لیگ (ن) کی مکمل حمایت کرے گی اور ایم کیو ایم کے تمام امیدوار ن لیگ کے حق میں دستبردار ہو جائیں گے۔

انتخابی مہم کے اختتام کے بعد اب تمام نظریں 27 جولائی کے پولنگ مرحلے پر مرکوز ہیں، جہاں میرپور ڈویژن کے 13 حلقوں میں ووٹرز اپنے نمائندوں کا انتخاب کریں گے۔