فیلڈ مارشل سید عاصم منیر سے کویتی وزیر خارجہ کی ملاقات، دوطرفہ تعلقات مزید مضبوط بنانے پر اتفاق

کویت کے وزیر خارجہ شیخ جراح جابر الاحمد الصباح نے جنرل ہیڈکوارٹرز (جی ایچ کیو) راولپنڈی میں فیلڈ مارشل سید عاصم منیر سے ملاقات کی جس میں باہمی دلچسپی کے امور، علاقائی سلامتی اور دوطرفہ تعاون کو مزید فروغ دینے کے اقدامات پر تفصیلی تبادلہ خیال کیا گیا۔

پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران پاکستان میں کویت کے سفیر ناصر عبدالرحمن جے المطیری بھی کویتی وزیر خارجہ کے ہمراہ موجود تھے۔

ملاقات میں پاکستان اور کویت کے درمیان دوطرفہ تعلقات سمیت مختلف شعبوں میں تعاون کو مزید مضبوط بنانے کے امکانات کا جائزہ لیا گیا۔ دونوں رہنماؤں نے مشترکہ مفادات کے تحفظ اور باہمی روابط کو مزید وسعت دینے پر اتفاق کیا۔

کویتی وزیر خارجہ نے خطے میں امن و استحکام کے فروغ کے لیے پاکستان کی مستقل حمایت اور تعمیری کردار کو سراہا۔ انہوں نے دونوں برادر ممالک کے درمیان دیرینہ، مضبوط اور برادرانہ تعلقات کو دونوں ممالک کے لیے اہم اثاثہ قرار دیا۔

یہ بھی پڑھیں: علاقائی کشیدگی کے دور ان فیلڈ مارشل عاصم منیر صرف فوجی کمانڈر نہیں بلکہ امن کے سفیر بن کر سامنے آئے، ایران انٹرنیشنل کی خصوصی رپورٹ

اس موقع پر فیلڈ مارشل سید عاصم منیر نے کویت کے ساتھ پاکستان کے مضبوط تعلقات کے عزم کا اعادہ کرتے ہوئے کہا کہ دونوں ممالک علاقائی امن، استحکام اور خوشحالی کے لیے مشترکہ وژن رکھتے ہیں۔ انہوں نے اس بات پر زور دیا کہ پاکستان کویت کے ساتھ اپنے برادرانہ تعلقات کو مزید مستحکم بنانے اور مختلف شعبوں میں تعاون کو فروغ دینے کے لیے پرعزم ہے۔

ملاقات کو پاکستان اور کویت کے درمیان قریبی سفارتی اور دفاعی روابط کے تسلسل کا مظہر قرار دیا جا رہا ہے، جبکہ دونوں ممالک نے باہمی تعاون کو مزید وسعت دینے کے عزم کا اظہار بھی کیا۔