آئی سی سی نے ون ڈے ورلڈ کپ 2027 کے 12 میزبان وینیوز کا اعلان کر دیا

انٹرنیشنل کرکٹ کونسل (آئی سی سی) نے آئی سی سی مینز کرکٹ ورلڈ کپ 2027 کے لیے 12 میزبان وینیوز کا باضابطہ اعلان کر دیا ہے۔ میگا ایونٹ کی مشترکہ میزبانی جنوبی افریقہ، زمبابوے اور نمیبیا کریں گے، جبکہ ورلڈ کپ 24 سال بعد دوبارہ افریقی سرزمین پر منعقد ہوگا۔

جوہانسبرگ میں منعقدہ ایک پروقار تقریب کے دوران ٹورنامنٹ کی برانڈنگ “تھری نیشنز، ون ہارٹ بیٹ” بھی متعارف کرائی گئی، جو تینوں میزبان ممالک کے اتحاد، ثقافتی تنوع اور باہمی ہم آہنگی کی علامت قرار دی گئی۔

نیا فارمیٹ، زیادہ سنسنی خیز مقابلے

آئی سی سی کے مطابق ورلڈ کپ میں 14 ٹیمیں شرکت کریں گی، جبکہ ٹورنامنٹ کے دوران مجموعی طور پر 57 میچز کھیلے جائیں گے۔ اس ایڈیشن کے لیے تین مرحلوں پر مشتمل نیا فارمیٹ متعارف کرایا گیا ہے تاکہ مقابلوں میں مزید مسابقت، دلچسپی اور سنسنی پیدا کی جا سکے۔

ابتدائی مرحلے میں عالمی درجہ بندی میں 12ویں سے 14ویں نمبر پر موجود تین ٹیموں کے درمیان سپر سیریز کھیلی جائے گی، جس کی فاتح ٹیم اگلے مرحلے میں جگہ بنائے گی۔

یہ بھی پڑھیں: ویسٹ انڈیز کے بائولر نے پاکستان کیخلاف ٹیسٹ کرکٹ میں نیا ریکارڈ بنا ڈالا

اس کے بعد 12 ٹیموں کو دو گروپس میں تقسیم کیا جائے گا، جہاں ہر گروپ میں چھ، چھ ٹیمیں راؤنڈ رابن کی بنیاد پر ایک دوسرے کے مدمقابل ہوں گی۔ دونوں گروپس سے سرفہرست تین، تین ٹیمیں جبکہ چوتھے نمبر پر آنے والی دونوں ٹیموں میں سے بہتر کارکردگی دکھانے والی ایک ٹیم سپر سیون مرحلے کے لیے کوالیفائی کرے گی۔

سپر سیون مرحلے میں سات ٹیموں کے درمیان 21 میچز کھیلے جائیں گے، جن کے اختتام پر سرفہرست چار ٹیمیں سیمی فائنل میں پہنچیں گی۔ پہلے سیمی فائنل میں پہلی اور چوتھی جبکہ دوسرے سیمی فائنل میں دوسری اور تیسری پوزیشن حاصل کرنے والی ٹیمیں آمنے سامنے ہوں گی۔

آئی سی سی حکام کا ردعمل

آئی سی سی کے چیئرمین جے شاہ نے کہا کہ میزبان شہروں اور ٹورنامنٹ برانڈنگ کا اعلان ورلڈ کپ 2027 کی تیاریوں میں ایک اہم سنگ میل ہے۔ ان کا کہنا تھا کہ 24 برس بعد ورلڈ کپ کی افریقہ واپسی عالمی کرکٹ کے لیے ایک تاریخی لمحہ ہے اور انہیں یقین ہے کہ جنوبی افریقہ، زمبابوے اور نمیبیا شاندار انداز میں اس عالمی ایونٹ کی میزبانی کریں گے۔

آئی سی سی کے چیف ایگزیکٹو سنجوگ گپتا نے کہا کہ ورلڈ کپ 2027 نہ صرف محدود اوورز کی کرکٹ کا سب سے بڑا ایونٹ ہوگا بلکہ افریقہ کی ثقافت، مہمان نوازی، تنوع اور کھیل سے محبت کو بھی عالمی سطح پر اجاگر کرے گا۔

یہ بھی پڑھیں: ویسٹ انڈیز کے بائولر نے پاکستان کیخلاف ٹیسٹ کرکٹ میں نیا ریکارڈ بنا ڈالا

تقریب میں کرکٹ شخصیات کی شرکت

اعلان کی تقریب میں جنوبی افریقہ کے سابق اور موجودہ کرکٹرز گریم اسمتھ، مخایا نتینی، ہاشم آملہ، ٹیمبا باووما اور کاگیسو ربادا نے شرکت کی۔ اس کے علاوہ زمبابوے کے ہیملٹن مساکادزا اور نمیبیا کے روڈولف جانسن وین ووورین بھی تقریب کا حصہ بنے۔