دنیا کی سب سے بڑی مٹی کی عمارت، انجینئرنگ کا حیرت انگیز شاہکار

افریقی ملک مالی کے تاریخی شہر جینے میں واقع گریٹ مسجد جینے دنیا کی سب سے بڑی مٹی سے تعمیر کی گئی عمارت ہے، جو صدیوں بعد بھی اسلامی فنِ تعمیر، ثقافتی ورثے اور روایتی انجینئرنگ کی منفرد مثال سمجھی جاتی ہے۔

یہ تاریخی مسجد مکمل طور پر کچی مٹی، گارے اور لکڑی سے تعمیر کی گئی ہے۔ ماہرین کے مطابق اس کی اصل تعمیر 13ویں صدی میں ہوئی، جبکہ موجودہ عمارت کو 1907ء میں ازسرِ نو تعمیر کیا گیا۔ اس غیر معمولی تاریخی اور ثقافتی اہمیت کے باعث یونیسکو نے 1988ء میں اسے عالمی ثقافتی ورثہ قرار دیا۔

یہ بھی پڑھیں :چین کی وہ سڑک جو گاڑی چلتے ہی موسیقی بجانے لگتی ہے

مسجد کی سب سے نمایاں خصوصیت اس کی مٹی سے بنی بلند دیواریں اور مینار ہیں، جنہیں سورج کی روشنی میں خشک کی گئی مٹی کی اینٹوں اور گارے سے تیار کیا گیا ہے۔ دیواروں سے باہر نکلتی لکڑی کی شہتیریں، جنہیں ٹورونز کہا جاتا ہے، عمارت کے حسن میں اضافہ کرنے کے ساتھ ساتھ مرمت کے دوران کاریگروں کے لیے عارضی سیڑھیوں کا بھی کام دیتی ہیں۔

ہر سال بارشوں کے موسم کے بعد مسجد کی دیکھ بھال کے لیے کریپیساج  کے نام سے ایک روایتی تقریب منعقد ہوتی ہے۔ اس موقع پر شہر کے رہائشی مل کر گارا تیار کرتے ہیں اور ایک ہی دن میں مسجد پر مٹی کی نئی تہہ چڑھا کر اس تاریخی ورثے کو محفوظ بناتے ہیں۔

یہ بھی پڑھیں:اسپاٹڈ لیک ایک ایسی جھیل جو ہر گرمی میں بدل دیتی ہے اپنا رنگ، وجہ کیا ہے؟

گریٹ مسجد جینے صرف عبادت گاہ ہی نہیں بلکہ مالی کے عوام کی ثقافتی شناخت، اجتماعی یکجہتی اور روایتی تعمیراتی مہارت کی ایک زندہ علامت بھی ہے، جسے دیکھنے کے لیے ہر سال دنیا بھر سے سیاح اور تاریخ سے دلچسپی رکھنے والے افراد مالی کا رخ کرتے ہیں۔