پاکستان میں سونے کی قیمت نے ایک بار پھر اڑان بھرلی ہے جس نے سونا خریدنے والوں اور سرمایہ کاری کرنیوالوں کے ہوش اڑادیے ہیں ، صرف چار دن میں فی تولہ قیمت میں تقریباً 29 ہزار روپے کا اضافہ دیکھنے میں آیا ہے ۔
تفصیلات کے مطابق پاکستان میں سونے کی فی تولہ قیمت 4 لاکھ 56 ہزار 536 روپے تک پہنچ گئی ہے، یوں 5 اگست سے اب تک فی تولہ سونا 28 ہزار 600 روپے مہنگا ہوچکا ہے، مسلسل اضافے نے مارکیٹ میں ایک بار پھر سونے کے مستقبل کے ریٹ پر بحث چھیڑ دی ہے۔
آل پاکستان جیمز اینڈ جیولرز صرافہ ایسوسی ایشن کے مطابق گزشتہ روز فی تولہ سونے کی قیمت میں 2,200 روپے کا اضافہ ہوا، جس کے بعد ریٹ 456,536 روپے ہوگیا، اسی طرح 10 گرام سونے کی قیمت بھی 1,887 روپے بڑھ کر 391,406 روپے ہوگئی۔
اس سے پہلے جمعہ کو سونے کی فی تولہ قیمت میں 5,100 روپے کا بڑا اضافہ ریکارڈ کیا گیا تھا اور ریٹ 454,336 روپے تک پہنچ گیا تھا۔
دوسری جانب چاندی کی قیمت میں کمی ریکارڈ کی گئی۔ ہفتے کے روز چاندی فی تولہ 113 روپے سستی ہوئی، جس کے بعد اس کی قیمت 6,826 روپے ہوگئی۔
یوں ہفتے کے اختتام پر سونے میں تیزی اور چاندی میں کمی نے قیمتی دھاتوں کی مارکیٹ میں ایک مختلف صورتحال پیدا کردی۔
عالمی مارکیٹ میں بھی سونا مہنگا
پاکستان میں سونے کی قیمت میں اضافے کے ساتھ عالمی مارکیٹ میں بھی تیزی دیکھی گئی ، بین الاقوامی مارکیٹ میں سونے کی قیمت 22 ڈالر بڑھ کر 4,341 ڈالر فی اونس ہوگئی۔
عالمی مارکیٹ میں سونے کی قیمت میں ہونے والی تبدیلیاں پاکستان کی مقامی مارکیٹ پر بھی اثر ڈالتی ہیں۔ اس کے علاوہ روپے کی قدر اور مقامی طلب سمیت دیگر عوامل بھی ملک میں سونے کے ریٹ کو متاثر کرسکتے ہیں۔
دوسری طرف سونا پہلے سے رکھنے والے افراد کے اثاثوں کی مالیت میں نمایاں اضافہ ہوا ہے، مارکیٹ میں قیمت مزید اوپر جانے کی صورت میں نئے خریداروں کے لیے خریداری مزید مہنگی ہوسکتی ہے، جبکہ قیمت میں کمی آنے کی صورت میں حالیہ سطح پر خریداری کرنے والوں کو نقصان کا سامنا بھی ہوسکتا ہے۔
اس لیے صرف تیزی دیکھ کر فوری سرمایہ کاری کا فیصلہ کرنے کے بجائے مارکیٹ کے رجحان اور اپنی مالی ضرورت کو بھی مدنظر رکھنا ضروری ہے۔
کیا سونے کی قیمت مزید بڑھے گی؟
حالیہ مسلسل اضافہ یہ ظاہر کرتا ہے کہ عالمی مارکیٹ کی حرکت پر پاکستان کی مقامی صرافہ مارکیٹ گہری نظر رکھے ہوئے ہے تاہم مستقبل میں سونے کی قیمت کہاں تک جائے گی، اس بارے میں حتمی پیش گوئی کرنا ممکن نہیں۔
عالمی سونے کے ریٹ، ڈالر کی قدر، ملکی معاشی صورتحال اور مارکیٹ کی طلب جیسے عوامل آنے والے دنوں میں اہم کردار ادا کرسکتے ہیں۔
By 
