معاشی سرگرمیوں میں بہتری کے آثار، گا ڑیوں کی فروخت میں بڑا اضافہ

پاکستان میں شرح سود بڑھنے کے باوجود گاڑیوں کی خریداری میں غیر معمولی اضافہ ریکارڈ کیا گیا ہے۔ اکتوبر 2026 کے دوران کاروں کی فروخت ماہانہ بنیادوں پر 76 فیصد جبکہ سالانہ بنیادوں پر 41 فیصد بڑھ گئی۔ گاڑیوں کی فروخت کے تازہ اعدادوشمار نے آٹو انڈسٹری میں تیزی کی نئی تصویر پیش کردی ہے۔

پاکستان آٹوموٹیو مینوفیکچررز ایسوسی ایشن (پاما) نے گاڑیوں کی فروخت سے متعلق ماہانہ اور سالانہ اعدادوشمار جاری کردیے ہیں۔ رپورٹ کے مطابق اکتوبر میں ملک بھر میں گاڑیوں کی مجموعی فروخت 24 ہزار 418 یونٹس رہی جبکہ مسافر گاڑیوں کی فروخت 21 ہزار 600 یونٹس ریکارڈ کی گئی۔

 یہ بھی پڑھیں :پاکستان میں گاڑیوں کی فروخت کو بریک لگ گئی، ستمبر میں بڑی کمی ،آٹو مارکیٹ ہل گئی

اعدادوشمار کے مطابق 660 سی سی کی 12 ہزار 500 جبکہ ایک ہزار سے 1300 سی سی کی 9 ہزار گاڑیاں فروخت ہوئیں۔ اس طرح چھوٹی اور درمیانے انجن کی گاڑیوں کی خریداری میں نمایاں سرگرمی دیکھنے میں آئی۔

رواں مالی سال کے پہلے چار ماہ میں گاڑیوں کی مجموعی فروخت گزشتہ مدت کے مقابلے میں 37 فیصد اضافے کے ساتھ 74 ہزار 898 یونٹس تک پہنچ گئی۔

دوسری جانب ٹریکٹرز کی فروخت میں بھی غیر معمولی تیزی ریکارڈ کی گئی۔ اکتوبر میں 4 ہزار 152 ٹریکٹرز فروخت ہوئے۔ ان کی فروخت میں سالانہ 44 فیصد جبکہ ماہانہ بنیادوں پر 129 فیصد اضافہ ہوا۔

 یہ بھی پڑھیں :نئی آٹو پالیسی میں تاخیر، ہائبرڈ گاڑیوں کی قیمتوں سے متعلق بڑی خبر آگئی

تاہم آٹو مارکیٹ کے تمام شعبوں میں یکساں تیزی دیکھنے میں نہیں آئی۔ جیپ اور پک اپ گاڑیوں کی فروخت سالانہ بنیادوں پر 27 فیصد کمی کے بعد 2 ہزار 700 یونٹس رہی۔ موٹرسائیکلوں اور تھری ویلرز کی فروخت 23 فیصد اضافے سے ایک لاکھ 98 ہزار 357 یونٹس تک پہنچ گئی۔

اعدادوشمار کے مطابق بسوں کی فروخت میں بھی 43 فیصد کمی ریکارڈ کی گئی، جس سے ظاہر ہوتا ہے کہ گاڑیوں کی مختلف اقسام کی طلب میں الگ الگ رجحانات سامنے آئے ہیں۔