پی آئی اے کیلئے خوشخبری ، ہیتھرو ایئرپورٹ پر 14 سلاٹس واپس مل گئے

پاکستان انٹرنیشنل ایئرلائنز کے لیے اہم پیش رفت سامنے آئی ہے، برطانیہ کے ہیتھرو ایئرپورٹ پر موسم سرما کے لیے عارضی طور پر ترک ایئرلائنز کو دیے گئے 14 سلاٹس واپس پی آئی اے کو مل گئے ہیں۔ سلاٹس کی واپسی کے بعد قومی فضائی کمپنی کے لیے لندن کے لیے پروازوں کی تعداد بڑھانے کی راہ ہموار ہوگئی ہے۔

ذرائع کے مطابق برطانیہ میں پی آئی اے کی پروازوں پر پابندی کے دوران ہیتھرو ایئرپورٹ پر قومی ایئرلائن کے 14 سلاٹس عارضی طور پر ترک ایئرلائنز کو مختص کیے گئے تھے۔ اب موسم سرما کے نئے پروازوں کے نظام الاوقات کے لیے یہ سلاٹس دوبارہ پی آئی اے کو فراہم کردیے گئے ہیں۔

 یہ بھی پڑھیں :پی آئی اے کنسورشیم کو انتظامی کنٹرول کی منتقلی کے ساتھ قومی ایئرلائن کی بحالی کا ایک نیا باب شروع ہو گیا ہے، شہباز شریف

ذرائع کا کہنا ہے کہ اکتوبر سے شروع ہونے والے موسم سرما کے شیڈول میں پی آئی اے اسلام آباد اور لاہور سے لندن کے لیے اپنی پروازوں میں اضافہ کرسکتی ہے۔ اس سلسلے میں پروازوں کی تعداد بڑھانے کے لیے منصوبہ بندی کی جارہی ہے۔

موجودہ شیڈول کے مطابق اسلام آباد سے لندن کے لیے پی آئی اے کی ہفتہ وار تین پروازیں چل رہی ہیں، جنہیں بڑھا کر پانچ کیے جانے کا امکان ہے۔ اسی طرح لاہور سے لندن جانے والی ہفتہ وار پروازوں کی تعداد ایک سے بڑھا کر دو کرنے پر بھی غور کیا جارہا ہے۔

سلاٹس کی واپسی سے نہ صرف اسلام آباد اور لاہور بلکہ کراچی اور سیالکوٹ سے لندن کے لیے سفری رابطوں میں بھی بہتری لانے کے امکانات پیدا ہوگئے ہیں۔ پی آئی اے ان شہروں سے لندن جانے والے مسافروں کے لیے رابطہ پروازوں کی تعداد میں اضافہ کرسکے گی۔

 یہ بھی پڑھیں :براہِ راست لندن سفر پھر ممکن، 6 سال بعد بڑی پیش رفت، پی آئی اے فلائٹ کی تاریخ سامنے آ گئی

ہیتھرو ایئرپورٹ کے سلاٹس پی آئی اے کے لیے خاص اہمیت رکھتے ہیں، کیونکہ لندن پاکستان اور برطانیہ کے درمیان فضائی سفر کا ایک اہم مرکز ہے۔ پروازوں میں ممکنہ اضافے سے بیرون ملک مقیم پاکستانیوں اور برطانیہ کا سفر کرنے والے مسافروں کو مزید سفری سہولت میسر آنے کی توقع ہے۔

ذرائع کے مطابق نئے شیڈول اور پروازوں کی حتمی تعداد سے متعلق فیصلہ انتظامی اور آپریشنل امور کا جائزہ لینے کے بعد کیا جائے گا۔