بھارت ٹرافی سے انکار کرکے اپنی خفت نہیں مٹا سکتا، طلال چوہدری

 وزیر مملکت برائے داخلہ طلال چوہدری نے بھارتی ویمنز کرکٹ ٹیم کی جانب سے ایشیا کپ کی ٹرافی وصول نہ کرنے کے معاملے پر سخت ردعمل کا اظہار کرتے ہوئے کہا ہے کہ بھارت کھیلوں کی روح اور بین الاقوامی معاہدوں کو نقصان پہنچا رہا ہے۔

 ٹرافی لینے سے انکار

بھارتی ویمنز ٹیم نے ویمنز ٹی ٹوئنٹی ایشیا کپ کے فائنل میں دفاعی چیمپئن سری لنکا کو شکست دے کر آٹھویں مرتبہ ٹائٹل اپنے نام کیا۔ تاہم کامیابی کے بعد ہونے والی انعامی تقریب میں بھارتی کھلاڑی ٹرافی وصول کرنے کے لیے گراؤنڈ میں نہیں آئیں۔

ایشین کرکٹ کونسل کے چیئرمین محسن نقوی تقریب کے دوران اسٹیج پر موجود تھے۔ بھارتی ٹیم نے ان سے ٹرافی وصول کرنے سے انکار کیا اور ڈریسنگ روم کے باہر موجود رہی۔ اس صورتحال کے باعث بھارتی ٹیم کے بغیر ہی تقریب مکمل کرنا پڑی اور ٹرافی اے سی سی کے پاس رکھ لی گئی۔

کھیل میں سیاست کا الزام

طلال چوہدری نے بھارتی ٹیم کے اس اقدام کو کھیلوں کو سیاست کی نذر کرنے کے مترادف قرار دیا۔ انہوں نے کہا  کہ پاکستان نے کبھی کھیل کو سیاست کے لیے استعمال نہیں کیا جبکہ بھارت اپنے طرز عمل سے کھیلوں کے عالمی کلچر کو نقصان پہنچا رہا ہے۔

 یہ بھی پڑھیں :بھارتی کرکٹ ٹیم نے سپورٹس مین سپرٹ کی دھجیاں بکھیر دی، ایشین کرکٹ کونسل کے صدر محسن نقوی سےٹرافی لینےسے انکار

وزیر مملکت نے کہا کہ بھارت ٹرافی وصول کرے یا نہ کرے اس طرح کے اقدامات سے سفارتی اور عسکری میدان میں ہونے والی شکست کی خفت ختم نہیں کی جا سکتی۔

بھارت عالمی سطح پر تنہا ہو رہا ہے

طلال چوہدری نے مزید کہا کہ نفرت کی سوچ کے ساتھ بھارت عالمی سطح پر تنہائی کی طرف بڑھ رہا ہے۔  محسن نقوی اپنی مصروفیات کے باوجود گراؤنڈ میں موجود تھے جبکہ بھارتی ٹیم کا تقریب میں شریک نہ ہونا ایک منفی طرز عمل ہے۔

پاکستان کا مؤقف

وزیر مملکت نے واضح کیا کہ پاکستان نے ہمیشہ کھیلوں کو سیاست سے الگ رکھنے کی کوشش کی ہے۔  کھیل مختلف ممالک کے درمیان مثبت رابطے اور باہمی تعلقات کو فروغ دینے کا ذریعہ ہوتے ہیں اور انہیں سیاسی اختلافات کا میدان نہیں بنانا چاہیے۔

ایشیا کپ فائنل کا پس منظر

ویمنز ایشیا کپ کے فائنل میں بھارتی ٹیم نے سری لنکا کو شکست دے کر ٹائٹل اپنے نام کیا۔ بھارت کے لیے یہ کامیابی آٹھواں ایشیا کپ ٹائٹل تھی۔ تاہم میچ کے بعد ٹرافی وصولی کی تقریب میں شرکت نہ کرنے کے فیصلے نے کھیلوں کی سرگرمی کو ایک مرتبہ پھر پاک بھارت سیاسی کشیدگی کے تناظر میں لا کھڑا کیا ہے۔

 یہ بھی پڑھیں :چیمپئینز ٹرافی 2025 : بھارت کا میزبان ’پاکستان‘ کا نام اپنی جرسی پر لکھنے سے انکار

بھارتی ٹیم کے اس فیصلے پر مختلف حلقوں کی جانب سے ردعمل سامنے آ رہا ہے۔ طلال چوہدری نے بھی اپنے بیان میں بھارت کے رویے کو تنقید کا نشانہ بناتے ہوئے کہا کہ کھیلوں کو سیاسی اختلافات اور نفرت کی نذر کرنا عالمی کھیلوں کی روایات کے لیے نقصان دہ ہے۔