وزیراعلیٰ پنجاب مریم نواز کے لندن کے نجی دورے کے دوران سرکاری طیارے کے استعمال کے اخراجات کی ادائیگی کے معاملے میں اہم پیش رفت سامنے آئی ہے اور 2 کروڑ 71 لاکھ 94 ہزار 4 روپے کا چیک ادائیگی کیلئے جمع کرا دیا گیا ہے۔
سامنے آنے والی بینک دستاویز کے مطابق 27,194,004 روپے مالیت کا چیک نیشنل بینک آف پاکستان کی ویلنشیا برانچ میں جمع کرایا گیا۔ دستاویز پر رقم الفاظ میں بھی درج ہے جبکہ چیک متعلقہ بینک سے وصول ہونے والی رقم کی منتقلی کے ذریعے جمع کرانے کی تفصیل بھی موجود ہے۔
بینک کی کیش/ٹرانسفر پے اِن سلپ پر چیک کی رقم 2 کروڑ 71 لاکھ 94 ہزار 4 روپے درج ہے دستاویز کے مطابق چیک بینک آف پنجاب کا ہے اور اسے نیشنل بینک کی متعلقہ برانچ میں جمع کرایا گیا ہے۔
ذرائع کے مطابق مذکورہ چیک کی رقم اگلے روز کلیئر ہونے کی توقع ہے تاہم بینک میں چیک جمع کرائے جانے اور رقم کے سرکاری اکاؤنٹ میں حتمی طور پر کریڈٹ ہونے میں فرق ہوتا ہے اس لیے حتمی ادائیگی کی تصدیق چیک کلیئر ہونے کے بعد ہی ہوگی۔
یہ پیش رفت ایسے وقت میں سامنے آئی ہے جب وزیراعلیٰ پنجاب کے لندن کے نجی دورے کے لیے پنجاب حکومت کے سرکاری طیارے کے استعمال پر سیاسی اور عوامی سطح پر سوالات اٹھائے گئے تھے مریم نواز گزشتہ ہفتے اپنی صاحبزادی کی گریجویشن تقریب میں شرکت کیلئے لندن گئی تھیں اور بعد ازاں لاہور واپس پہنچی تھیں۔
پنجاب حکومت کی جانب سے ابتدا ہی سے یہ مؤقف اختیار کیا گیا تھا کہ وزیراعلیٰ نے لندن کے دورے کے اخراجات اپنی جیب سے ادا کرنے کا فیصلہ کیا ہے صوبائی وزیر اطلاعات عظمیٰ بخاری نے بھی کہا تھا کہ وزیراعلیٰ نے دورے کے تمام اخراجات خود برداشت کیے ہیں اور متعلقہ ریکارڈ دستیاب ہونے پر رسید بھی فراہم کی جائے گی۔
دوسری جانب اس معاملے پر پنجاب اسمبلی میں بھی سوالات اٹھائے گئے تھے اپوزیشن رکن وقاص محمود مان نے وزیراعلیٰ کے لندن دورے کے اخراجات کی تفصیلات سامنے لانے کیلئے تحریک التوائے کار جمع کرائی تھی۔ اس میں سرکاری طیارے کے مبینہ استعمال ایندھن پارکنگ اور دیگر اخراجات کی تفصیلات ایوان میں پیش کرنے کا مطالبہ کیا گیا تھا۔
اس سے قبل ایک رپورٹ میں دعویٰ کیا گیا تھا کہ سرکاری طیارے کے نجی استعمال کے اخراجات کا پہلا چالان 2 کروڑ 93 لاکھ 65 ہزار 976 روپے کا جاری کیا گیا تھا جس میں بعد ازاں دو مرتبہ ترمیم کی گئی اور رقم پہلے 2 کروڑ 80 لاکھ 37 ہزار 844 روپے اور پھر 2 کروڑ 71 لاکھ 94 ہزار 4 روپے کردی گئی۔ اس دعوے کے مطابق آخری رقم ہی ادائیگی کیلئے مقرر کی گئی۔
اب سامنے آنے والی بینک پے اِن سلپ سے کم از کم یہ ظاہر ہوتا ہے کہ 2 کروڑ 71 لاکھ 94 ہزار 4 روپے کا چیک ادائیگی کیلئے بینک میں جمع کرایا گیا ہے تاہم یہ دستاویز بذاتِ خود اس بات کا حتمی ثبوت نہیں کہ رقم سرکاری خزانے میں کریڈٹ ہوچکی ہے اس کیلئے چیک کلیئرنس یا متعلقہ سرکاری اکاؤنٹ میں رقم جمع ہونے کا ریکارڈ درکار ہوگا۔
یوں مریم نواز کے لندن دورے کے سرکاری طیارے کے استعمال سے متعلق جاری بحث میں اب ایک اہم پیش رفت سامنے آگئی ہے جبکہ اگلا اہم مرحلہ چیک کی کلیئرنس اور رقم کے سرکاری خزانے میں جمع ہونے کی تصدیق ہوگا۔
