پاک چین سرحد پر سیکیورٹی تعاون کے حوالے سے ایک اہم پیش رفت سامنے آئی ہے، جہاں تاریخ میں پہلی مرتبہ منٹیکا پاس کے مقام پر چینی فوج اور گلگت بلتستان پولیس کی خنجراب سیکیورٹی پولیس کے درمیان مشترکہ سرحدی مشقوں کا انعقاد کیا گیا۔
یہ مشترکہ مشقیں سطح سمندر سے تقریباً 4 ہزار 600 میٹر کی بلندی پر واقع منٹیکا سرحدی مقام پر ہوئیں، جہاں شدید دشوار گزار جغرافیائی حالات کے باوجود دونوں ممالک کے سیکیورٹی اہلکاروں نے مختلف سرگرمیوں میں حصہ لیا۔
پولیس اہلکاروں کا مشکل سفر
خنجراب سیکیورٹی پولیس کے اہلکار مسلسل دو روز تک دشوار پہاڑی راستوں پر سفر کرتے ہوئے منٹیکا سرحدی مقام تک پہنچے۔ وہاں پہنچنے کے بعد انہوں نے چینی فوج کے اہلکاروں کے ساتھ مشترکہ سرحدی مشقوں میں شرکت کی،ان سرگرمیوں کا بنیادی مقصد بلند ترین اور مشکل سرحدی علاقوں میں سیکیورٹی اداروں کے درمیان رابطے کو بہتر بنانا اور عملی صلاحیتوں کو مزید مؤثر بنانا تھا۔
پیشہ ورانہ صلاحیتوں کا تبادلہ
مشترکہ مشقوں کے دوران سرحدی نگرانی، باہمی رابطے اور مشکل جغرافیائی حالات میں سیکیورٹی سے متعلق پیشہ ورانہ مہارتوں کو بہتر بنانے پر توجہ دی گئی،اس سرگرمی کو پاک چین سرحد پر دونوں ممالک کے سیکیورٹی اداروں کے درمیان تعاون اور عملی روابط کے حوالے سے اہم پیش رفت قرار دیا جارہا ہے۔
چینی فوج کی جانب سے ضیافت
مشترکہ مشقوں کے موقع پر چینی فوج کی جانب سے خنجراب سیکیورٹی پولیس کے اہلکاروں کے اعزاز میں خصوصی ضیافت کا بھی اہتمام کیا گیا،اس موقع پر دونوں جانب کے اہلکاروں نے باہمی خیرسگالی کا اظہار کیا اور دوستانہ روابط کو مزید مضبوط بنانے کے عزم کا اعادہ کیا۔
ہتھیاروں اور سازوسامان کی نمائش
چینی فوج کی جانب سے خنجراب سیکیورٹی پولیس کے جوانوں کے لیے مختلف اقسام کے ہتھیاروں اور دفاعی سازوسامان کی نمائش بھی کی گئی،پولیس اہلکاروں کو چینی فوج کے استعمال میں آنے والے مختلف دفاعی آلات اور سازوسامان سے متعلق معلومات فراہم کی گئیں۔
تحائف کا تبادلہ
دونوں ممالک کے سیکیورٹی اہلکاروں کے درمیان دوستانہ تعلقات کے فروغ کے لیے تحائف کا بھی تبادلہ کیا گیا۔ چینی فوج کی جانب سے خنجراب سیکیورٹی پولیس کے اہلکاروں میں تحائف تقسیم کیے گئے۔
پاک چین تعاون کی نئی مثال
منٹیکا پاس پر ہونے والی یہ مشترکہ سرگرمی پاک چین سرحدی سیکیورٹی تعاون کی ایک نئی مثال کے طور پر سامنے آئی ہے۔ بلند اور دشوار گزار سرحدی علاقے میں دونوں ممالک کے اہلکاروں کی مشترکہ سرگرمی سے باہمی رابطوں اور پیشہ ورانہ تعلقات کو مزید فروغ دینے میں مدد ملنے کی توقع ہے۔یہ مشقیں دونوں ممالک کے سیکیورٹی اداروں کے درمیان تعاون، دوستانہ روابط اور سرحدی علاقوں میں مشترکہ پیشہ ورانہ سرگرمیوں کے بڑھتے ہوئے دائرہ کار کی عکاسی کرتی ہیں۔
By 
