معروف امریکی پروفیشنل ریسلر اینڈی ولیمز جو ریسلنگ کی دنیا میں دی بچر کے نام سے مشہور تھے 48 برس کی عمر میں انتقال کر گئے۔ سابق اے ای ڈبلیو اسٹار کو پنسلوانیا کے شہر مل ویل میں ایک ریسلنگ مقابلے کے بعد اچانک طبی ایمرجنسی کا سامنا کرنا پڑا جس کے بعد انہیں ہسپتال منتقل کیا گیا تاہم وہ جانبر نہ ہوسکے۔
اینڈی ولیمز 5 ستمبر کی شب Enjoy Wrestling کے ایک ایونٹ میں اپنے دیرینہ ٹیگ ٹیم ساتھی دی بلیڈ یعنی جیسی گلمیٹ کے ساتھ مقابلے میں شریک تھے۔ دونوں کا سامنا TME سے تھا۔ میچ ختم ہونے کے بعد ولیمز رنگ کے کنارے اچانک گر پڑے اور فرش سے ٹکرا گئے۔
ایونٹ کے منتظمین کے مطابق ولیمز اس وقت ہوش میں تھے لیکن جواب نہیں دے رہے تھے اور ان کی حالت تیزی سے خراب ہوئی۔ موقع پر موجود دو ڈاکٹروں نے فوری طور پر طبی امداد شروع کردی، جبکہ ایمبولینس طلب کی گئی۔ ڈاکٹروں نے سی پی آر کے ساتھ خودکار برقی جھٹکا دینے والے آلے (AED) کا بھی استعمال کیا، تاہم انہیں ہسپتال پہنچانے کے باوجود بچایا نہ جا سکا۔
طبی ایمرجنسی کے باعث ایونٹ فوری طور پر ختم کردیا گیا اور شائقین کو ہال سے باہر بھیج دیا گیا۔ انتظامیہ کی جانب سے تمام تر توجہ اینڈی ولیمز کو طبی امداد فراہم کرنے اور ہسپتال منتقل کرنے پر مرکوز کردی گئی۔ کمپنی نے بعد ازاں مداحوں اور ریسلنگ سے وابستہ افراد کا تشویش اور حمایت کے اظہار پر شکریہ ادا کیا۔
مقامی رپورٹس کے مطابق انہیں رات تقریباً 9 بج کر 43 منٹ پر مردہ قرار دیا گیا۔ ان کی موت کی حتمی وجہ اور طریقۂ موت کا سرکاری تعین اس وقت تک جاری نہیں کیا گیا تھا۔ Enjoy Wrestling کے شریک مالک کرٹ ہیکمر کے مطابق موقع پر موجود طبی عملے نے علامات کو ممکنہ کارڈیک ایونٹ سے مطابقت رکھنے والا قرار دیا تھا، تاہم حتمی وجہ پوسٹ مارٹم رپورٹ کے بعد سامنے آنا تھی۔
اینڈی ولیمز صرف ریسلنگ ہی نہیں بلکہ موسیقی کی دنیا میں بھی نمایاں شناخت رکھتے تھے۔ وہ معروف ہیوی میٹل بینڈ Every Time I Die کے بانی گٹارسٹوں میں شامل تھے اور 1998 سے 2022 تک بینڈ کے ساتھ وابستہ رہے۔
ریسلنگ میں ولیمز نے 2019 میں All Elite Wrestling یعنی AEW، کے ساتھ نمایاں مقام حاصل کیا اور The Butcher کے کردار میں The Blade کے ساتھ ٹیگ ٹیم بنائی۔ دونوں کی جوڑی نے AEW کے مقابلوں میں طویل عرصے تک شرکت کی اور بعد میں آزاد ریسلنگ سرکٹ میں بھی ایک ساتھ کام جاری رکھا۔
ان کی اچانک موت کی خبر سامنے آنے کے بعد ریسلنگ اور موسیقی کی دنیا سے تعزیتی پیغامات کا سلسلہ شروع ہوگیا۔ AEW نے بھی اینڈی ولیمز کو خراج عقیدت پیش کرتے ہوئے انہیں موسیقی اور پروفیشنل ریسلنگ دونوں شعبوں میں نمایاں خدمات انجام دینے والی شخصیت قرار دیا اور ان کے اہل خانہ، دوستوں اور مداحوں سے تعزیت کی۔
