وفاقی حکومت کا اہم اقدام، پنجاب کے مختلف اضلاع میں رینجرز تعینات

وفاقی حکومت نے امن و امان کی صورتحال برقرار رکھنے کے لیے اسلام آباد اور پنجاب کے مختلف اضلاع میں پاکستان رینجرز کی تعیناتی کی منظوری دے دی ہے۔

چیف کمشنر اسلام آباد اور حکومت پنجاب کی درخواست پر وفاقی وزارت داخلہ نے اسلام آباد اور پنجاب میں رینجرز کو قانونی اختیارات کے تحت سیکیورٹی معاملات میں مکمل معاونت فراہم کرنے کی اجازت دے دی۔

قانونی اختیارات

وزارت داخلہ کے اعلامیے کے مطابق رینجرز کی تعیناتی پاکستان رینجرز آرڈیننس 1959 کی دفعات 7 (b) اور 10 جبکہ انسداد دہشت گردی ایکٹ 1997 کی دفعات 4 اور 5 کے تحت کی گئی ہے۔

پولیس کے ساتھ تعاون

اعلامیے میں کہا گیا ہے کہ تعینات کیے جانے والے رینجرز اہلکار امن و امان برقرار رکھنے اور سیکیورٹی کے لیے پولیس اور متعلقہ اداروں کو ضروری معاونت فراہم کریں گے۔

رینجرز کو مختلف علاقوں میں سیکیورٹی صورتحال کے مطابق ضروری ذمہ داریاں انجام دینے کی ہدایت کی گئی ہے، جبکہ پولیس کے ساتھ مل کر کسی بھی ممکنہ خطرے سے نمٹنے کے لیے اقدامات کیے جائیں گے۔

پرتشدد کارروائیوں پر جوابی اقدام

وزارت داخلہ کے نوٹیفکیشن میں واضح کیا گیا ہے کہ اگر کسی انتشاری یا مسلح جتھے کی جانب سے حملہ کیا جاتا ہے تو رینجرز اور پولیس اپنے دفاع کے لیے مناسب اور ضروری جوابی کارروائی کر سکتے ہیں۔

سیکیورٹی اقدامات مکمل رکھنے کی ہدایت

وفاقی وزارت داخلہ نے رینجرز اور پولیس کو کسی بھی پرتشدد سرگرمی یا ممکنہ خطرے سے نمٹنے کے لیے تمام ضروری اقدامات مکمل رکھنے کی ہدایات جاری کی ہیں۔

امن و امان برقرار رکھنے کی ذمہ داری

وزارت داخلہ کے مطابق اسلام آباد اور پنجاب کے متعلقہ اضلاع میں تعینات رینجرز اہلکار امن و امان برقرار رکھنے، سیکیورٹی معاونت فراہم کرنے اور ضرورت کے مطابق دیگر ذمہ داریاں انجام دیں گے۔

وفاقی حکومت کی جانب سے یہ فیصلہ اسلام آباد اور پنجاب میں سیکیورٹی انتظامات کو مزید مؤثر بنانے اور کسی بھی ممکنہ پرتشدد صورتحال سے نمٹنے کے لیے کیا گیا ہے۔